Истанбулда ўлдирилган ўзбекистонлик аёлнинг яқинлари айбдорларга ўлим жазоси берилишини кутяпти

Туркиянинг Истанбул шаҳрида даҳшатли қотилликдан сўнг жасадининг бўлаклари чиқинди контейнеридан топилган Ўзбекистон фуқароси Дурдона Ҳакимованинг акаси Элдор Жўраев ҳамда туркиялик турмуш ўртоғи Эрҳан Дурсун гумонланувчиларга энг олий жазо берилишини сўрамоқда. Бу ҳақда улар турк матбуотида қилган илк чиқишида сўз очди.

Маълумки, гумондорлар – Ўзбекистон фуқаролари Дилшод Турдимуродов ва Ғофуржон Камолхўжаев чет элга қочмоқчи бўлган пайтда қўлга олиниб, қамоққа олинган. Дилшод Турдимуродов сўроқ вақтида Ҳакимова билан ўртасида муносабат бўлганини даъво қилган.

Икки фарзанднинг онаси бўлган Ҳакимованинг акаси Элдор Жўраев ҳамда унинг 38 ёшли турмуш ўртоғи Эрҳан Дурсун бу ваҳший жиноятга кескин норозилик билдириб, гумонланувчининг даъволарини рад этган. Оила аъзолари қотиллар энг олий жазога тортилишини талаб қилаётганини маълум қилди.

«Қотил томонидан айтилган «диний никоҳ», «севгилиси бўлганман» деган гаплар фақат ўз жиноятини енгиллатиш учун қилинган баёнотлардир, ҳеч қачон бундай ҳолат бўлмаган. Ичимдан ўтганини тўлиқ айтиб бера олмаяпман.

У дўстларига «айланиб келаман», деган экан. Қўшнимиз билан бир соатдан кейин Байрампашадаги бир савдо марказига боришга келишиб қўйишган экан. Кечқурун соат тахминан 23:00–24:00 атрофида эди, ётишга тайёрланаётгандик. Бир пайт эшик қоқилди. Ўғлим югуриб очди, мен ҳам чиқдим – 5-6 нафар полиция ходими келган эди.

Шундан кейин мени бўлимга олиб кетишди, сўроқ хонасига киритишди. 1-2 соат ўтиб қотиллар ҳам олиб келинди. Улар менга қандай ўлдирилганини айтмади, фақат «вафот этган» деб айтишди. Бошида ишона олмадим.

Гумонланувчиларни фақат сўроқ хонасининг ойнаси орқасидан кўрдим: кириб келишганда, йўлакда юрар экан, қўллари чўнтакларида, жуда хотиржам қадам ташлаб кетаётган эди», – деди Эрҳан Дурсун.

Турмуш ўртоғи билан гумонланувчи ўртасида муносабат бўлгани ҳақидаги даъволарни рад этган Эрҳан Дурсун шундай дейди:

«Хотиним мени ҳеч қачон алдамайди. Мен бунга 99 фоиз эмас, 100 фоиз ишончим комил. Чунки агар алдаш нияти бўлганида, у ерга ўғлим билан бормас эди. Ўғлим ҳамма нарсани гапира оладиган, одамлар билан очиқ мулоқот қиладиган бола – бундай ҳолат асло бўлмайди. Ҳатто кимдир онасига тегиб кетса ҳам, бу ўғлимни жуда безовта қилади.

Кимдир унга хабар ёзган, у ёки курткаси, ёки телефони учун борган – иккаласидан бири. У уйга бориши учун бошқа ҳеч қандай сабаб йўқ. Қаерга борса ҳам, менга қаерда эканини, жойлашувини, ким билан эканини доим айтиб турарди.

Мен адолатга ишонаман. Бундай ваҳший қотилликни содир этган шахсга энг юқори даражада жазо берилишини истаймиз. Иншааллоҳ, шундай бўлади. Хотиним у билан икки томонлама мулоқотга киришган, деб ўйламайман. Чунки хотинимнинг овози баланд, агар шундай жанжал бўлганида, уни маҳалладаги одамлар бемалол эшитган бўлар эди», – дейди у.

Сўзларини давом эттирган Эрҳан Дурсун хотини гумондор билан Ўзбекистонда танишганини, гумондорнинг опаси ва қизи қарийб 2 ой уларнинг уйида яшаганини айтади.

«Хотиним воқеа жойига автобусда борган. Ўғлимнинг айтишича, уйга яқин бир дўкон олдида кутиб туришган. Онаси «ҳозир келаман», деган. 5 дақиқадан кейин ўғлим соат 14:45 да онасига қўнғироқ қилади, жавоб бўлмайди. 15:17 да яна қўнғироқ қилади, яна жавоб йўқ. Яна бир марта қилади, жавоб берилмайди.

Ёнидаги шахс эса ўғлимни олиб, таксига ўтқазган. Таксичига Оқсарой метро бекати олдига олиб боришни айтган. Такси ўша ерда туширган. Ўғлим у ердан уйга пиёда қайтган. Эҳтимол, ўғлимни чалғитиш учун онасини ичкарига ёлғиз чақиришган», – дейди эркак.

Оиласи катта қайғу ичида эканини ва гумонланувчилар энг оғир жазони олиши кераклигини айтган Ҳакимованинг акаси Элдор Жўраев шундай дейди:

«Ишда эдим. Кейин келдим. Кейин ойим билан адамни олиб келдим. Улар аммамникига кетишган эди. Сўнг Тошкентдан учиб келдим. Ўлим жазоси берилишини кутяпмиз. Ўзимизни ҳали ҳам ёмон ҳис қиляпмиз. Ҳали ҳам шокдамиз. Бунақа бўлишини кутмаган эдим. Йўқотиш оғир келди».

Тергов версияси

23 январ куни Дилшод Турдимуродов ва Ғофуржон Камолхўжаев ўзаро тил бириктириб, Истанбулнинг Умрания туманида жойлашган квартирада Сайёра Эргашалиевага пичоқ билан ҳужум қилгани ва жасадни бир нечта қисмга бўлиб, Фотиҳ туманидаги бир нечта чиқинди қутисига ташлагани билдирилмоқда.

24 январ куни гумонланувчилар Сайёра Эргашалиеванинг телефони орқали унинг яқин дугонаси Дурдона Ҳокимовага хабар юбориб, уни ҳам чақиргани, кейин эса худди шу усулда ўлдириб, жасадни Шишли туманидаги чиқинди қутиларига ташлагани айтилган.

Айрим оммавий ахборот воситаларида С.Эргашалиеванинг жасади топилгани ҳақида маълумот тарқалган. Бироқ Истанбул суд-тиббий экспертизасига ҳозирча жасад олиб келинмагани маълум қилинди.

Консуллик баёноти

Ўзбекистоннинг Истанбулдаги Бош консуллиги мазкур ҳолатни доимий назоратга олгани ва Туркия ҳуқуқни муҳофаза қилувчи органлари билан яқин ҳамкорликда иш олиб бораётганини билдирди.

Тергов ҳаракатлари давом этмоқда. Гумонланувчиларга нисбатан қамоқ эҳтиёт чораси қўлланилгани, улар айбини тан олгани ва ҳужжатлар судга тақдим этилгани қайд этилди.

Консуллик марҳумаларнинг оила аъзолари ва яқинларига чуқур ҳамдардлик билдирди ҳамда қўшимча маълумотлар аниқлаштирилиши билан жамоатчилик хабардор қилиниши маълум қилинди.