Janubiy Koreyaning mashhur it go‘shti bozori huvillab qoldi

Janubiy Koreyada it go‘shti savdosiga taqiq 2027-yil fevral oyidan boshlab kuchga kiradi. Bir vaqtlar mamlakatdagi it go‘shti savdosining ramzi hisoblangan Kyongido provinsiyasining Sonnam shahridagi Moran bozori endi bo‘shab qoldi. Bu haqda «The Korea Times» xabar berdi.

Nashrning yozishicha, bo‘sh ko‘chalar, kimsasiz restoranlar va ko‘plab yopiq do‘konlar o‘nlab yillar davomida gullab-yashnagan sanoatning tanazzulini aks ettiradi. Bozordagi 10 ga yaqin it go‘shti restoranlarida mijozlar yetishmayapti, kelgan odamlar ham juda kam. Savdogarlar so‘nggi yillarda uy hayvonlariga munosabat o‘zgargani, talab keskin kamaygani va narxlar oshgani sababli mijozlar deyarli qolmaganini aytmoqda.

«Hozirgi kunda it go‘shtiga ko‘p mijozlar qiziqmaydi, u faqat bir nechta do‘konlarda sotiladi», — deydi Ju ismli mahalliy savdogar.

Uning aytishicha, bozorda ko‘pchilik it go‘shti o‘rniga qora echki taomlarini sotishga o‘tgan. O‘tgan yili it fermalarining taxminan 80 foizi yopilganidan so‘ng, it go‘shti narxi ham keskin ko‘tarilgan, bu esa taklifni sezilarli darajada kamaytirgan. Savdogarning so‘zlariga ko‘ra, ilgari it sho‘rvasi uning do‘koni daromadining 90 foizini tashkil etar edi, ammo hozir u 5 foizdan ham kam. Qora echki sho‘rvasiga ixtisoslashgan restoranlarning qattiq raqobatiga qaramay, kelgusi yilda u mol go‘shti sho‘rvasiga o‘tishga qaror qilgan.

Bu o‘zgarishlar Janubiy Koreya 2024-yilning fevral oyida it go‘shti iste’molini taqiqlovchi qonunni qabul qilganidan keyin yuz bermoqda. Ushbu qoidalarga ko‘ra, 2027-yil 7-fevraldan boshlab itlarni so‘yish va ularning go‘shtini sotish butunlay taqiqlanadi. Yangi qonun tufayli hattoki 30 yildan ortiq vaqt mobaynida faqat it go‘shtidan tayyorlangan sho‘rva iste’mol qilganlar ham bu odatidan voz kechmoqda.

Nafaqat iste’molchilar odatlari o‘zgarmoqda, balki kichik biznes ham ko‘plab qiyinchiliklarga duch kelmoqda. Janubiy Koreyaning Oziq-ovqat va dori-darmon xavfsizligi vazirligi ma’lumotlariga ko‘ra, may oyi oxiriga kelib 563 ta restoran o‘z biznes modellarini o‘zgartirgan va 336 tasi yopilishga majbur bo‘lgan, bu taqiqdan ta’sirlangan jami 4154 ta biznesning 21,6 foizini tashkil qiladi.

Milliy it go‘shti assotsiatsiyasi vakillarining ta’kidlashicha, 2,5 million vonlik (taxminan 1,7 ming dollar) hukumat subsidiyasi biznes egalarining belgilar, menyularni o‘zgartirish va biznes jarayonlarini qayta tashkil etish xarajatlarini qoplash uchun yetarli emas. Ko‘pchilik bu yangi sektorda mavjud restoranlar bilan raqobatlashishda qiynalib qolishidan qo‘rqib, ikkilanmoqda.

Eslatib o‘tamiz, O‘zbekiston 2026-yilning birinchi yarmida 481,7 mln dollarlik go‘sht import qildi. Import hajmi oshgani bilan birga narxlar ham keskin qimmatladi