Ўзбекистон Қозоғистондан чорва учун ўн минглаб гектар ер сўради
Ҳайвонларни Қозоғистон ҳудудида боқиб, кейин Ўзбекистон бозорига олиб кириш таклиф қилинмоқда. Ўзбекистон ҳозирнинг ўзида қўшни давлат гўштининг асосий харидори ҳисобланади. Қозоғистоннинг жами гўшт экспортининг 90 фоиздан ортиғи Ўзбекистон ҳисобига тўғри келади.
© Foto: ritmeurasia.ruЎзбекистон Қозоғистонда саноат усулида чорвачиликни ривожлантириш бўйича қўшма лойиҳани амалга оширишни таклиф қилди. Бу ташаббусни Ўзбекистон Савдо-саноат палатаси раиси Даврон Ваҳобов Ўзбекистон-Қозоғистон бизнес-форумида билдирди.
Унинг сўзларига кўра, ўзбекистонлик инвесторларга Қозоғистон ҳудудида чорва моллари учун ёш ҳайвонларни мустақил равишда сотиб олиш, ем-хашак базасини яратиш ва чорвани боқиб, семиртириш имкониятини бериш таклиф этилмоқда. Ҳайвонлар товар оғирлиги — 400 килограммдан ошганидан кейин Ўзбекистонга экспорт қилиниши мумкин.
Лойиҳани амалга ошириш учун чорва молларини семиртириш мақсадида 50 минг гектаргача ер ажратиш таклиф қилинмоқда.
Аслида, ушбу ташаббус Қозоғистондан Марказий Осиёда саноат усулида гўшт чорвачилигини ривожлантириш учун асосий майдон сифатида фойдаланишни назарда тутади. Қозоғистонда бунинг учун зарур ер ресурслари мавжуд. Мамлакат аллақачон Ўзбекистонга гўшт маҳсулотлари етказиб беришда муҳим ўрин тутади.
Лойиҳа амалга оширилса, Қозоғистоннинг агросаноат мажмуасига узоқ муддатли инвестициялар жалб қилиниши ва мамлакатнинг минтақадаги йирик гўшт етказиб берувчи сифатидаги мавқеи янада мустаҳкамланиши кутилмоқда. Ўзбекистон ҳозирнинг ўзида Қозоғистон гўштининг асосий харидори ҳисобланади. 2025-йилда Қозоғистон Ўзбекистонга 32 минг тонна мол гўшти ва 34 минг тонна қўй гўшти экспорт қилган. Экспортнинг умумий қиймати қарийб 300 миллион долларни ташкил этган. Қозоғистоннинг жами гўшт экспортининг 90 фоиздан ортиғи Ўзбекистон ҳисобига тўғри келади.
Ўзбекистонда гўштга бўлган талаб ўсмоқда
Ўзбекистонда гўштга бўлган талаб аҳоли сонининг ўсиши туфайли юқори. Мамлакатнинг йиллик гўштга бўлган эҳтиёжи 2,15 миллион тоннага етган, ички ишлаб чиқариш эса тахминан 1,6 миллион тоннани ташкил этади. Ҳосил бўлаётган тақчиллик импорт ҳисобига қопланмоқда.
Шу сабабли Қозоғистон географик яқинлиги, ривожланган логистикаси ва икки давлатнинг минтақавий иқтисодий ҳамкорлиги туфайли Ўзбекистон учун энг қулай ҳамкорлардан бири ҳисобланади.
Бизнес-форум якунида томонлар ушбу ташаббусни муҳокама қилишни давом эттиришга келишиб олди. Пилот лойиҳанинг аниқ жойлашуви, ер ажратиш шартлари ва инвесторларни лойиҳага жалб қилиш тартиби ҳозирча белгиланмаган.
Миллий статистика қўмитасининг 2025 ва 2026-йил биринчи ярми учун эълон қилган маълумотлари таққосланганда, Ўзбекистонда гўшт етиштириш 58,1 минг тоннага ёки 4,3 фоизга камайгани маълум бўлди. Қўмитанинг янги ҳисоботида эса 0,9 фоизлик ўсиш қайд этилган. Бундай тафовут қандай юзага келгани изоҳланмаган.
Эслатиб ўтамиз, аввалроқ Ўзбекистонда чорвачиликни ривожлантириш учун 463 миллион доллар ажратилиши ҳақида хабар берилганди.
