Ўзбекистонлик икки шахматчи жаҳоннинг кучли бешлигига кирди
46-Бутунжаҳон шахмат олимпиадаси якунланганидан сўнг ФИДЕнинг октябрь ойи рейтингида ўзбекистонлик шахматчилар бир нечта юқори натижаларни қайд этди.
Халқаро шахмат федерацияси (FIDE)нинг октябрь рейтинги янгиланди. 46-Бутунжаҳон шахмат олимпиадасидан кейин Ўзбекистонлик шахматчиларнинг натижалари сезиларли ўзгарди.
Янги рейтингда Жавоҳир Синдоров 2782 рейтинг очкоси билан жаҳон рейтингида 4-ўринни эгаллади. Синдоров олимпиададан сўнг 4 очко қўшиб, америкалик Фабиано Каруанога яқинлашди.
Нодирбек Абдусатторов эса 2780 очко билан 5-ўринга кўтарилди. Нодирбек Ёқуббоев ҳам жаҳоннинг кучли 30 шахматчиси қаторига кирди. У 2712 очко билан 26-ўринни эгаллаган.
Мамлакатлар рейтингида ҳам Ўзбекистон юқори ўринда. Энг кучли 10 нафар шахматчининг ўртача рейтинги ҳисобланганда, Ўзбекистон 2637 очко билан 5-ўринда қайд этилган. Биринчи ўринда АҚШ — 2723, иккинчида Ҳиндистон — 2704, учинчида Хитой — 2663 очко билан бормоқда.
Рейтингда норвегиялик Магнус Карлсен 2823 очко билан биринчи, америкалик Хикару Накамура 2792 очко билан иккинчи, яна бир америкалик Фабиано Каруана 2784 очко билан учинчи ўринда турибди.
Эслатиб ўтамиз, 46-Бутунжаҳон шахмат олимпиадаси 16–27 сентябрь кунлари Самарқандда ўтказилди. Ўзбекистон эркаклар терма жамоаси финал турида Украина устидан 2,5:1,5 ҳисобида ғалаба қозониб, ўз тарихида иккинчи бор олимпиада олтинини қўлга киритди.
