«Ўзбекнефтгаз»нинг янги раҳбарияти олдингисининг хатоларини такрорламайдими?
Бошқарув раисининг биринчи ўринбосари эски раҳбариятнинг камчиликларини ўрганганиб, таҳлил қилганини айтди.
«Ўзбекнефтгаз» аксиядорлик жамиятининг янги раҳбарияти олдингиси даврида амалга оширилган дастурларни қайта кўриб чиқди. Бу ҳақда АЖ бошқарув раисининг молия, трансформация ва хусусийлаштириш бўйича биринчи ўринбосари Суҳроб Ҳамроев кеча, 20-апрел куни бўлиб ўтган матбуот анжуманида маълум қилди.
«Бу биринчи раҳбариятимизда янги дастур ишлаб чиқилганда, авваламбор эски амалга оширилган дастурлар қайта кўриб чиқилди. Яъни, таҳлиллар натижасида камчиликлар аниқлаб бориб, ўша аниқланган камчиликлар бўйича ўзимизга дастур қилиб олганмиз. Бу нафақат ишлаб чиқариш ёки харидлар ёки инвестиция, ҳамма йўналиш бўйича қайта таҳлил қилиб чиқилди. Мисол учун, инвестиция фаолияти бўйича ҳам лойиҳаларда ҳар қандай бесамара ёки фақат лойиҳа қилиш учун лойиҳа эмас, яъни ростдан ҳам самара берадиган лойиҳаларни кўриш учун алоҳида бизда инвестицион ишчи гуруҳ ишлаб чиқарилган», – деди Ҳамроев.
Унинг сўзларига кўра, инвестицион пакетга киритиш учун юқори малакали мутахассислар, чет эллик мутахассислар ҳар битта лойиҳанинг самарадорлигини аниқлаб, у иқтисодий манфаат келтирсагина, уни амалга ошириш бўйича ва инвестиция дастурига киритиш бўйича қарор қабул қилинади.
«Худди шундай ишчи гуруҳ геология йўналишида ҳам алоҳида ишчи гуруҳлар тузиб олганмиз. Ҳар битта қудуқни бурғулашдан олдин, унинг бир жойини, яъни «точка»сини аниқлашдан олдин юқори малакага эга бўлган мутахассислар томонидан, фақатгина биздан эмас, ташқи мутахассислар томонидан ҳам ўрганиб чиқилиб, кейин қарор қабул қилинади», – деди АЖ раҳбарининг биринчи ўринбосари.
Шунингдек, Ҳамроев комплаенс-назорат режими ҳам кучайтирилганини таъкидлади.
«Давлатимиз раҳбарининг шахсан ўзлари томонидан бизда комплаенс ва коррупцияга қарши кураш бўйича алоҳида бошқарув раиси ўринбосари тайинланган. Бошқарув раиси ўринбосари томонидан мана шу тизимда, фақатгина аппаратда эмас, яъни ижро аппаратида эмас, бутун тизимда ҳам мана шунақа коррупциявий ҳолатлар юзага келмаслиги учун алоҳида қатъий назорат кучайтирилган, мана шу чора-тадбирлар белгилаб олинган», – деди Суҳроб Ҳамроев.
Янги раҳбарият
2023-йилнинг март ойидан «Ўзбекнефтгаз» АЖ бошқарув раиси сифатида ишлаган Баҳодиржон Баҳромович Сиддиқов 2025-йилнинг декабрида лавозимидан озод этилганди. Унинг ўрнига Абдуғани Абдураҳмонович Сангинов бошқарув раиси этиб тайинланди.
Сангинов бир неча нефт базалари раҳбарларини ишдан олди. 2026-йил феврал ойида «Ўзбекнефтгаз» акциядорлик жамияти бошқарув раисига янги ўринбосарлар тайинланди.
