Паролни унутдингизми? Google аккаунтга «селфи-видео» орқали кириш функциясини ишга туширди

Google компанияси пайшанба куни аккаунтга кириш ва уни тиклаш учун янги «селфи-видео» функциясини ишга туширди. Бу ҳақда «Reuters» хабар бермоқда.

Янги имконият фойдаланувчиларга парол эсдан чиққанда ёки асосий қурилмага кириш имкони бўлмаганда ўз аккаунтини тиклашнинг яна бир муқобил усулини тақдим этади.

Тизимга уланиш учун фойдаланувчи бошнинг турли бурчакларга ҳаракатланиши акс этган қисқа видеони ёзиб олиши керак бўлади. Google бу ёзувни сақлаб қолади ва кейинчалик аккаунтга киришга уриниш вақтида юкланган жонли видеоларни тасдиқлаш учун ундан фойдаланади.

Дипфейклардан ҳимоя ва махфийлик

Мазкур функция фирибгарликдан кучлироқ ҳимоя ва қурилмалар йўқолган ҳолатлар учун қулайлик яратса-да, шахсий ҳаёт ва биометрик маълумотларни тўплаш бўйича хавотирларни ҳам келтириб чиқариши мумкинлиги айтилмоқда.

«Селфи-видео фойдаланувчининг розилиги билан сақланади ва у исталган вақтда ўз Google аккаунтидан буни ўчириб ташлаш имконига эга. Видеодан фақатгина аккаунтга кириш мақсадида фойдаланилади, фойдаланувчи қўшимча мақсадларда ишлатишга рухсат берган ҳолатлар бундан мустасно», — дейилади компания хабарида.

Қайд этилишича, Google сохталаштириш уринишларини, жумладан, дипфейкларни аниқлаш учун бир нечта хавфсизлик текширувларини қўллайди. Бунинг учун янги ёзув сақланган селфи-видео билан солиштирилади ва видео жонли эканини тасдиқловчи ҳаракатларни бажариш талаб этилади.

Функция пайшанба кунидан бошлаб белгиланган талабларга мос келувчи фойдаланувчилар учун очиқ бўлади. Ҳозирда аксарият компаниялар аккаунтни тиклаш учун ишончли қурилмалар, рўйхатдан ўтган телефон рақамлари, қўшимча контактлар ва икки босқичли тасдиқлаш усулларидан фойдаланиб келмоқда.