Қирғизистон парламенти спикери Қамчибек Ташиевни «шоқол» деб атади

Айни кунларда Қирғизистонда Миллий хавфсизлик қўмитаси собиқ раиси Қамчибек Ташиевга оид суд жараёнлари бўлиб ўтмоқда. Ушбу иш оммавий ахборот воситаларида «75 лар хати» номини олди.
 
Жогорку Кенеш спикери Марлен Маматалиeв суд жараёни ҳақида гапирар экан Қамчибек Ташиевни шоқолга, унинг тарафдорларини эса шоқол болаларига қиёслади.
 
«Шоқол ва унинг болалари ўз ўйинларини ўйнамоқчи бўлишди, лекин улар ҳеч қачон шерни мағлуб эта олмаслигини унутишди. Чунки, шернинг ортида 7 миллион одам бор», - деди Марлен Маматалиeв.
 
Спикернинг таъкидлашича, мактуб ташаббускорлари ўзларига қўйилган айбловларни рад этмоқда. Унинг фикрича, улар ўз ҳаракатлари ва ниятларини тан олганлари маъқул бўларди. Марлен Маматалиев мазкур масалага якуний ҳуқуқий баҳони суд бериши кераклигини қайд этган.
 
Мазкур иш доирасида Миллий хавфсизлик давлат қўмитасининг собиқ раҳбари Қамчибек Ташиев, собиқ бош прокурор Қурманқул Зулушев, Жўқорғу Кенешнинг собиқ спикери Нурланбек Турғунбек ўғли ҳамда яна бир қатор собиқ амалдорлар айбланувчи сифатида иштирок этмоқда. 
 
Маълумот ўрнида, Қамчибек Ташиев «Ҳокимиятни зўрлик билан эгаллаш ёки ушлаб туриш, шунингдек, конституциявий тузумни зўрлик билан ўзгартиришга қаратилган ҳаракатлар» ҳамда «Мансаб ваколатини суиистеъмол қилиш» моддалари билан айбланаётган эди.