Қирғизистонда 540 та объектда фаол қурилиш ишлари олиб борилмоқда

Қирғизистондаги 540 та объектда фаол қурилиш ишлари олиб борилмоқда. Бу ҳақда Қурилиш, архитектура ва уй-жой коммунал хизмат кўрсатиш вазири Нурдан Ўрунтаев маълум қилди. Унинг сўзларига кўра, бу йил объектлардан 200 га яқини фойдаланишга топширилиши керак.

«Барча қурилиш майдончаларига видеокузатув камералари ўрнатилганлиги сабабли, бугунги кунда текширув ўтказиш учун жойига боришга катта эҳтиёж йўқ. Асосан, махсус инспекторлар қурилишда ишлайди ва ишларни жойида бажаради. Вақтим бўлганда қурилиш майдончаларига ўрнатилган камераларни мунтазам равишда кузатиб боришга ҳаракат қиламан. Масалан, бизда бутун мамлакат бўйлаб 540 та фаол қурилиш майдончаси мавжуд. Ҳозирда 540 та фаол қурилиш майдончасининг аксарият қисмида видеокамералар ўрнатилган», — дейди Нурдан Ўрунтаев.

Шунингдек, у ўз нутқида ҳозирда Президент Садир Жапаровнинг шахсий назорати остида Бишкекда 20 та, Ўшда 10 та ва Манасда 6 та йирик мактаб қурилаётганини таъкидлади. Ушбу мактаблар жорий ўқув йилига қадар фойдаланишга топширилади.