Қурғоқчилик ва жазирама Европа иқтисодиётига қанчага тушгани маълум қилинди
Қуруқ об-ҳаво Европа қишлоқ хўжалигига жиддий зарар етказган.
Европа Иттифоқи ҳудудининг 38 фоизида қурғоқчилик кузатилмоқда. «Euractiv» маълумотларига кўра, бу кўрсаткич экин майдонларининг 14,8 фоизи ва ўрмонларнинг 14,5 фоизини қамраб олган.
Қурғоқчилик айниқса Ғарбий Европада кучайган. Бунга ўрмон ёнғинлари, экстремал иссиқ об-ҳаво ва ёғингарчиликнинг камлиги таъсир қилган.
Қайд этилишича, қуруқ об-ҳаво қишлоқ хўжалигига ҳам жиддий зарар етказган. Яйловларнинг қуриши ва ем-хашак экинларининг шикастланиши сабаб фермерлар қиш учун жамғарилган озуқа захираларидан муддатидан олдин фойдаланишга мажбур бўлмоқда.
Иқтисодий зарар
Зарар кўлами қишлоқ хўжалигининг турли тармоқларида сезилмоқда. Жумладан, зайтун мойи ишлаб чиқариш, шунингдек, маккажўхори ва кунгабоқар каби асосий озуқа экинлари қурғоқчиликдан зарар кўрган.
10 август куни «Spiegel» нашри Европа бўйлаб тарқалган экстремал иссиқлик ва қурғоқчилик 2026 йилда Европа Иттифоқи учун кутилаётган иқтисодий ўсишни йўққа чиқариши мумкинлигини ёзди.
Ҳисоб-китобларга кўра, жазирама туфайли иқтисодий фаолиятдаги узилишлар ЕИ ялпи ички маҳсулотини тахминан 1 фоизга қисқартириши мумкин. Бу қарийб 180 миллиард евролик иқтисодий йўқотишга тенг.
Асосий омил сифатида меҳнат унумдорлигининг пасайиши келтирилмоқда, унинг таъсирида ЯИМ 0,6 фоизга камайиши кутилмоқда.
