Қурилиш ишларининг қарийб учдан бири норасмий сектор ҳиссасига тўғри келмоқда

Миллий статистика қўмитаси маълумотларига кўра, 2026 йилнинг январь–апрель ойларида Ўзбекистонда норасмий сектор томонидан 23,2 трлн сўмлик қурилиш ишлари амалга оширилган. Бу кўрсаткич ўтган йилнинг мос даврига нисбатан 14,4 фоизга ошган.

Ҳисоботга кўра, қурилиш ишларининг энг катта қисми кичик корхона ва микрофирмалар ҳиссасига тўғри келган. Улар томонидан 39,6 трлн сўмлик ишлар бажарилган бўлиб, бу умумий ҳажмнинг 46,9 фоизини ташкил этади.

Норасмий сектор улуши 27,5 фоизга тенг бўлиб, 23,2 трлн сўмлик қурилиш ишларини қамраб олган.
Йирик қурилиш ташкилотлари эса 21,6 трлн сўмлик ишлар бажариб, бозорнинг 25,6 фоизини шакллантирган.
Шундай қилиб, мамлакатда бажарилган ҳар тўрт сўмлик қурилиш ишининг қарийб бири норасмий сектор ҳиссасига тўғри келмоқда.

Аввалроқ, қурилиш соҳасида шикоятлар сони 2026-йилнинг дастлабки 3 ойидаёқ мингтага яқинлашгани ҳақида хабар берган эдик. Таққослаш учун 2025-йил давомида ушбу кўрсаткич 1706 тани ташкил қилган эди.