Россия Марокашдан бензин импорт қилишни бошлади
Марокаш Украина дронлари ҳужумлари ортидан Россия бензин импорт қила бошлаган учинчи давлатга айланди. Бу ҳужумлар оқибатида Россиядаги нефтни қайта ишлаш заводлари фаолияти қисқариб, бензин ишлаб чиқариш сўнгги 20 йилдаги энг паст даражага тушиб кетган.
© Foto: gazeta.ruРоссия Марокашдан денгиз орқали тахминан 30 минг тонна АИ-92 маркали бензин олиб келди. Бу ҳақда «Reuters» соҳадаги икки манбага таяниб хабар берди.
Манбаларга кўра, Панама байроғи остида сузувчи танкер июль ўрталарида Марокашнинг Танжер портидан бензин юклаб олган ва ҳозирда Россиянинг Арктикадаги Мурманск портида юкини туширмоқда. Агентлик маълумотига кўра, ёқилғини етказиб берувчи компания «Лукойл» бўлган.
Қайд этилишича, Марокашдан келтирилган бензин Санкт-Петербург товар-хомашё биржасида ҳам сотувга чиқарилган бўлиши мумкин. Харидорларга Мурманск портидаги «Кола» темирйўл станциясидан етказиб бериш шарти билан АИ-92 бензини таклиф этилмоқда.
Марокаш Украина дронлари ҳужумлари ортидан Россия бензин импорт қила бошлаган учинчи давлатга айланди. Бу ҳужумлар оқибатида Россиядаги нефтни қайта ишлаш заводлари фаолияти қисқариб, бензин ишлаб чиқариш сўнгги 20 йилдаги энг паст даражага тушиб кетган.
«Reuters» манбаларига кўра, июль ойида Россияда ишлаб чиқарилган бензин ички талабнинг атиги 65 фоизини қоплаган. Мамлакатдаги умумий ёқилғи танқислиги эса 700–800 минг тоннага етган. Июль ойи охирида Мурманск вилоятидаги Витино портига Ҳиндистондан бензин ортилган илк танкер ҳам етиб келди. Унда «Vadinar» нефтни қайта ишлаш заводида ишлаб чиқарилган 42 минг тонна бензин бўлган.
Шунингдек, Россия учун мўлжалланган бензин юкланган яна бир танкер — «Varg» Суэц канали томон ҳаракатланмоқда. У ерда юк бошқа кемага ортилади ва Россия портларидан бирига етказилади.
Умуман олганда, Ҳиндистон Россияга жами қарийб 100 минг тонна бензин етказиб беришга розилик берган. Иккала партияни ҳам «Nayara Energy» компанияси жўнатади. Ушбу компаниянинг 49 фоиз улуши «Роснефть»га тегишли.
Июль ўрталарида Россия нефть компаниялари Ҳиндистон нефтни қайта ишлаш заводларидан бензин етказиб бериш ҳажмини оширишни сўраган. Бироқ Ҳиндистоннинг давлат нефть компаниялари бу таклифни рад этган. Бундан ташқари, Қозоғистоннинг «Конденсат» нефтни қайта ишлаш заводи ҳам Россияга тахминан 10 минг тонна бензин юборган. «Reuters» маълумотига кўра, Қозоғистон жами 50 минг тонна бензинни «гуманитар ёрдам» доирасида сотишга розилик билдирган.
Эслатиб ўтамиз, аввалроқ Россия бензин экспортига қўйилган тақиқни 2027-йил бошигача узайтирганди.
