Россия НАТО чегараси яқинида йирик объект қурмоқда
24.08.2025 | 22:002 daqiqa
Россия Калининград областида НАТО ва Полша чегарасидан атиги 25 км узоқликда улкан радиотехника мажмуасини қурмоқда. Бу ҳақда Bild нашри сунъий йўлдош тасвирларига таяниб хабар берди.
Маълумотларга кўра, Черняховск шаҳри яқинида 2023 йил март ойидан буён ҳалқа шаклидаги катта антенна мажмуаси барпо этилмоқда. Ҳудуд тозаланган, девор билан ўралган, йўллар қурилган ва бинолар учун майдонлар тайёрланган.
Таҳлилчиларнинг таъкидлашича, ҳудудда антенна устунлари учун қазилган чуқурлар ва камида олтита ҳалқа шакли аниқ кўриниб турибди. Бу турдаги қурилма «ҳалқасимон антенна панжараси» деб аталади ва ҳарбий радиотехника разведкаси ҳамда алоқа тизимлари учун мўлжалланган.
Мутахассислар объект диаметри 1600 метрга етганини қайд этмоқда. Бу эса мавжуд шунга ўхшаш мажмуа ва станциялардан бир неча баробар катталигини англатади.
Лойиҳа тўлиқ ишга тушгач, Россия НАТОнинг Шарқий Европа ва Болтиқбўйи давлатларидаги радиоалоқаларини кузатиш имконига эга бўлади. Шунингдек, Болтиқ денгизи ва Атлантика океанининг шимолий қисмидаги сув ости кемалари билан барқарор алоқани таъминлаш режалаштирилган.
