Rossiya Xitoy fuqarolariga 30 kunlik vizasiz kirishni joriy qildi
Moskva Xitoy fuqarolarining turli toifalari uchun vizasiz rejimni ochdi, bu ikki davlat o‘rtasidagi strategik yaqinlashuv va o‘zaro imtiyozlarning navbatdagi qadami sifatida qayd etilmoqda.
Rossiya prezidenti Vladimir Putin Xitoy fuqarolarining bir vaqtning o‘zida 30 kungacha vizasiz mamlakatga kirishiga ruxsat beradigan farmonni imzoladi. Yangi tartib sayyohlar, biznes vakillari, olimlar, san’at arboblari hamda sportchilar kabi bir qator toifalarni qamrab oladi.
Putin va Xitoy raisi Si Jinpin 2022 yil boshida chegara bilmas strategik hamkorlik to‘g‘risidagi kelishuvni imzolagani munosabati bilan ikki tomonlama munosabatlar yangi bosqichga ko‘tarilgan. Ukrainadagi mojaro va G‘arb sanksiyalari sharoitida Moskva Pekin bilan iqtisodiy aloqalarni faol kuchaytirib kelmoqda.
Farmonga ko‘ra, vizasiz rejim 2026 yil 14-sentabrgacha amal qiladi. Rossiya tomoni bunday qadam bilan Xitoyning rossiyalik oddiy pasport egalariga 30 kunlik vizasiz sayohat imkonini bergan qarorini aks ettirganini ta’kidladi.
Shu bilan birga, yangi tartib Xitoydan keluvchi mehnat migrantlari, uzoq muddatlik ta’lim uchun keladigan talabalar, shuningdek, logistika va transport sohasi xodimlariga taalluqli emas. Bu toifalar uchun amaldagi talablar saqlanib qoladi.
Xitoy Tashqi ishlar vazirligi sentabr oyida rossiyaliklarga vizasiz rejim bir yil davomida amal qilishi haqida ma’lum qilgan edi.
Avvalroq O‘zbekiston Xitoy fuqarolari uchun vizasiz rejimni 30 kunga uzaytirgan edi.
