Тожикистон 2029-йилгача экспорт ҳажмини 3,1 млрд долларга етказмоқчи

Тожикистон ўрта муддатли истиқболда товарлар экспортини ҳар йили ўртача 5,5 фоизга оширишни режалаштирмоқда. Бундай кўрсаткичлар ҳукумат томонидан тасдиқланган мамлакатнинг 2027–2029-йилларга мўлжалланган асосий макроиқтисодий кўрсаткичлари прогнозига киритилган.

Ҳужжатга кўра, 2027-йилда экспорт ҳажми 2,8 миллиард долларни ташкил этиши кутилмоқда — бу 2026-йил учун прогноз қилинган кўрсаткичдан 6,3 фоизга кўп. 2028-йилда экспорт 2,9 миллиард долларгача ёки 4,7 фоизга ошиши, 2029-йилда эса тахминан 3,1 миллиард долларга етиб, яна 5,6 фоизга ўсиши мумкин.

Шу билан бирга, ҳукумат ҳисоб-китобларига кўра, келгуси уч йил ичида импорт анча секин суръатларда ўсади. 2027-йилда унинг ҳажми 8,3 миллиард доллар бўлиши прогноз қилинмоқда — бу ўтган йилга нисбатан атиги 0,1 фоизга кўп. 2028-йилда импорт деярли ўзгармайди ва 8,3 миллиард долларни ташкил этади, 2029-йилда эса 8,5 миллиард долларгача ёки 1,9 фоизга ошади.

Шундай қилиб, Тожикистоннинг ташқи савдо айланмаси 2027-йилда 11,2 миллиард долларни, 2028-йилда 11,3 миллиард долларни, 2029-йилда эса 11,6 миллиард долларни ташкил қилиши мумкин. Ташқи савдо ҳажмининг ўтган йилга нисбатан ўсиши 2027-йилда 1,6 фоиз, 2028-йилда 1,2 фоиз ва 2029-йилда 2,9 фоиз даражасида прогноз қилинмоқда.

Статистика агентлиги маълумотларига кўра, 2026-йилнинг биринчи ярмида Тожикистоннинг ташқи савдо айланмаси қарийб 6,82 миллиард долларни ташкил этиб, ўтган йилнинг шу даврига нисбатан 44,2 фоизга ошган. Экспорт 65,4 фоизга ўсиб, 1,58 миллиард долларга етган. Импорт эса 38,8 фоизга ошиб, 5,24 миллиард долларни ташкил этган. Экспортнинг сезиларли даражада ўсиши, аввало, қимматбаҳо ва ярим қимматбаҳо тошлар ҳамда металларнинг экспорт қилиниши билан боғлиқ бўлган.