Трамп «туғуруқ туризми»ни тақиқлади ва туғилиш орқали АҚШ фуқаролигини олишни чеклади

АҚШ президенти Дональд Трамп туғилиш ҳуқуқи асосида Америка фуқаролигини олишни чеклашга қаратилган иккита ижро фармонини имзолади. Ҳужжатлардан бири «туғуруқ туризми» деб аталадиган амалиётни тақиқлайди. Бу ҳақда Оқ уй хабар берди.

Фармонлар 6-август куни, Трамп маъмуриятининг «туғилган жой ҳуқуқи» тамойилини чеклашга қаратилган аввалги уриниши муваффақиятсиз тугаганидан сал кўпроқ вақт ўтиб имзоланди. Мазкур тамойилга кўра, АҚШ ҳудудида туғилган шахс автоматик равишда мамлакат фуқаролигини олади.

Биринчи фармон ушбу тамойилдан истисно ҳолатлар рўйхатини кенгайтиради. Ҳужжатга кўра, агар АҚШда туғилган боланинг ота-онасидан камида бири террорчилик ташкилоти аъзоси бўлса, АҚШ фуқаролигини фирибгарлик йўли билан олишга уринган бўлса ёки АҚШ ҳудудида бошқа давлат манфаатларини расмий равишда ифодаласа, болага автоматик равишда фуқаролик берилмайди. Бу тоифага, жумладан, дипломатлар ҳам киради.

Иккинчи фармон эса «туғуруқ туризми»га қарши қаратилган. Бу амалиётда ҳомиладор хорижлик аёллар фарзандини АҚШда дунёга келтириш ва боланинг автоматик равишда АҚШ фуқаролигини олишини таъминлаш мақсадида мамлакатга боради.

«Бу масала анча олдин ҳал қилиниши керак эди, аммо биз уни ҳозир ҳал қиляпмиз», — деди Трамп фармонларни имзолаш чоғида.

Оқ уй раҳбарининг миллий хавфсизлик бўйича маслаҳатчиси Стивен Миллернинг айтишича, эндиликда сафардан асосий мақсад туғуруқ қилиш ва болага АҚШ фуқаролигини олиш бўлса, бундай хорижликларга виза берилмайди.

«Одамлар бу ерга ўзини сайёҳ сифатида кўрсатиб келади. Асл мақсади эса фарзандини шу ерда дунёга келтириш, унга автоматик фуқаролик олиш ва кейин мамлакатни тарк этишдир», — деди у.

Миллернинг таъкидлашича, бундай йўл билан фуқаролик олган болалар кейинчалик ижтимоий нафақалар, сайлов ҳуқуқи ва АҚШ фуқароларига бериладиган бошқа имтиёзлардан фойдаланиш имконига эга бўлади. Трампнинг айтишича, «туғуруқ туризми» туфайли АҚШда юз минглаб болалар дунёга келган. Бироқ у бу рақам қайси даврни қамраб олишини аниқлаштирмади.

«Ҳозир айрим одамлар буни бизнесга айлантирган. Бой кишилар туғилиш орқали фуқаролик олиш тизими атрофида бизнес қурмоқда. Бундай бўлиши керак эмас», — деди Трамп.

Мазкур фармонлар Трампнинг туғилиш орқали фуқаролик олишни чеклашга қаратилган иккинчи уриниши бўлди. У 2025-йилнинг январь ойида ҳам АҚШда туғилган айрим хорижликлар фарзандларига автоматик фуқаролик беришни чеклашни назарда тутувчи фармонни имзолаган эди.

Эслатиб ўтамиз, аввалроқ Трамп АҚШнинг кейинги президенти сифатида кимни кўришини айтганди.