Visa Xitoyning 144 trln dollarlik bank kartalari bozoriga kirishga ruxsat oldi

Xitoy Markaziy banki Amerikaning Visa xalqaro to‘lov tizimiga mamlakat bozoriga kirish uchun tayyorgarlikni boshlashga ruxsat berdi. Bu haqda «Bloomberg» xabar berdi.

Ruxsat Visa kompaniyasiga Xitoy ichida bank kartalari orqali amalga oshiriladigan to‘lovlarni qayta ishlash va hisob-kitoblarni amalga oshirish bilan shug‘ullanuvchi tashkilot tuzishga tayyorgarlik ko‘rish imkonini beradi. 2025-yilda Xitoyda bank kartalari orqali amalga oshirilgan operatsiyalarning umumiy qiymati 144 trln dollarni tashkil etgan.

«Bloomberg»ning ta’kidlashicha, Visa Xitoyda faoliyat yuritish uchun litsenziya olishga 2017-yildayoq ariza topshirgan. Biroq kompaniya mamlakat ichidagi bank kartalari to‘lovlarini qayta ishlash tizimini yaratishga faqat endi ruxsat oldi.

Visa bir yil ichida tayyorgarlik ishlarini yakunlashi, shundan so‘ng faoliyatini boshlash uchun ariza topshirishi kerak.

Kompaniya bosh direktori Rayan Makinerni olingan ruxsatni izohlar ekan, quyidagilarni ta’kidladi:

«Dunyoning ikki yirik iqtisodiyoti o‘rtasida konstruktiv va strategik jihatdan barqaror munosabatlarni yo‘lga qo‘yishda AQSH va Xitoy yetakchilarining muhim rolini yuqori baholaymiz».

2025-yilning oxirida Xitoyda muomalada bo‘lgan bank kartalari soni 10,2 mlrdga yetgan. O‘tgan yili mamlakatda bank kartalari orqali amalga oshirilgan operatsiyalarning umumiy qiymati 144 trln dollarni tashkil qilgan.

Nashr ma’lumotiga ko‘ra, Visa’ning raqobatchisi Mastercard Xitoyda bank kartalari bo‘yicha hisob-kitoblarni amalga oshirishga ixtisoslashgan o‘z biznesini tashkil etish uchun 2020-yildayoq ruxsat olgan. Bir necha oy o‘tib, «American Express» kompaniyasiga ham bank kartalari orqali amalga oshiriladigan to‘lovlarga xizmat ko‘rsatishni boshlashga ruxsat berilgan.

Sentyabr oyining oxirida Xitoy raisi Si Szinpin Vashingtonda AQSH prezidenti Donald Tramp bilan uchrashgan. «The Wall Street Journal» nashrining yozishicha, Xitoy Markaziy banki Visa’ga ruxsatni aynan ikki davlat rahbarlari o‘rtasidagi muzokaralardan keyin bergan. Bundan tashqari, Visa rahbari Rayan Makinerni Trampning may oyida Xitoyga qilgan tashrifi davomida ham unga hamrohlik qilgan.