ХВЖ Ўзбекистон иқтисодиёти қизиб кетиши мумкинлигидан огоҳлантирди

Халқаро валюта жамғармаси (ХВЖ) Ўзбекистон иқтисодиёти айни пайтда кутилган салоҳиятдан ҳам тезроқ ўсиш имкониятига эга эканини маълум қилди. Ташкилот экспертларининг баҳолашича, бундай юқори суръатлар мамлакатда ички талабнинг ҳамон барқарор ва юқори даражада сақланиб қолаётгани билан бевосита боғлиқ.

ХВЖнинг баҳолашича, мамлакат иқтисодиёти юқори ўсиш суръатларини сақлаб қолмоқда. Инфляция босқичма-босқич пасаймоқда, бюджет ва ташқи ҳисоблар кўрсаткичлари яхшиланмоқда, халқаро захиралар эса етарли даражада қолмоқда.

Ташкилот маълумотларига кўра, 2025 йилда Ўзбекистон ялпи ички маҳсулоти 7,7 фоизга ўсган. 2026 йилнинг биринчи чорагида эса иқтисодий ўсиш суръати йиллик ҳисобда 8,7 фоизгача тезлашган.

Ички талаб хавфи

ХВЖ ҳисоботида иқтисодиётнинг қизиб кетиш хавфига алоҳида эътибор қаратилган. Жамғарма мутахассислари кучли ички талаб иқтисодий фаолликни потенциал даражадан юқорига олиб чиққан бўлиши мумкинлигини таъкидлади.

Ташкилотнинг таъкидлашича, бундай шароитда ҳукумат эҳтиёткор иқтисодий сиёсат юритиши лозим.

Хусусан, 2026 йилда бюджет даромадлари режадан юқори шаклланиши мумкин бўлса ҳам, давлат харажатларини оширишдан тийилиш тавсия қилинган.

ХВЖнинг қайд этишича, йил давомида харажатларга тузатишлар киритишни чеклаш инфляцияни пасайтиришга ёрдам беради.

Олтин даромадларига эҳтиёткорлик

Жамғарма давлат молиясини хомашё даромадларига ортиқча боғлаб қўймасликни ҳам тавсия қилди. Хусусан, олтин ва бошқа фойдали қазилмалардан келаётган вақтинчалик юқори тушумлар асосида бюджет харажатларини режалаштирмаслик мақсадга мувофиқ экани айтилди.

ХВЖ бюджет барқарорлигини баҳолаш учун фойдали қазилмалардан тушадиган даромадларни ҳисобга олмаган ҳолда бирламчи бюджет тақчиллиги бўйича қўшимча мезон жорий этишни таклиф қилди.

Ташкилотнинг фикрича, бу ёндашув иқтисодий ўсиш юқори бўлган даврларда давлат харажатларининг ортиқча кенгайишини чеклаш ва молиявий барқарорликни сақлашга ёрдам беради.