Бир гуруҳ ўқитувчилар Макттабгача ва мактаб таълими вазирлигини судга берган эди. 26 август куни Шайхонтоҳур туманлараро судида беш нафар она тили ва адабиёт ўқитувчилари томонидан Мактбача ва мактаб таълими вазирлиги устидан берилган даъво иши кўриб чиқилди.
Улар аттестация имтиҳонлари қайта ўтказилиши, етказилган маънавий зарар ҳамда вакил харажатлари қопланишини талаб қилмоқда. Судя Гули Шукурлаева раҳбарлигида ўтган мажлисда вазирлик вакиллари, адвокатлар, экспертлар ҳамда ОАВ ходимлари қатнашди. Бу ҳақда Xalqtaliminfo.uz нашри хабар берди.
Ўқитувчилар имтиҳон жараёнида техник носозликлар, адолатсиз саволлар ва тестология қоидаларига риоя этилмагани ҳақида эътироз билдиришди. Уларга кўра, баъзи саволлар бир нечта қисмдан иборат бўлиб, ажратилган вақтга мутаносиб эмас, айрим ҳолларда эса умуман тўғри жавоб йўқ саволлар ҳам учраган. Шунингдек, тест саволлари «Х варианти» орқали олдиндан тарқатилгани ҳақида шубҳалар билдирилди.
Адвокат Муҳаммадамин Каримжонов имтиҳон жараёнидаги техник муаммоларни аниқлаш учун вазирликдан «лог файл»ларни талаб қилди. Унинг таъкидлашича, бу ҳужжатлар компьютерлардаги узилишлар ва жавобларнинг ўзгаришини исботловчи асосий далил бўлиши мумкин. Шунингдек, ўқитувчилар апелляция комиссияси уларнинг шикоятларини асосли кўриб чиқмаганини билдирди.
Вазирлик вакиллари эса тест саволлари муаллифларини ошкор этиш мумкин эмаслигини, саволлар апробациядан ўтказилганини ва белгиланган талабларга жавоб беришини айтишди. Улар «Х варианти» тарқалгани ҳақидаги маълумотни рад этишди ҳамда педагоглар апелляцияда шахсан иштирок этишни сўрамаганини қайд қилишди.
Суд барча материалларни мустақил экспертлар ёрдамида ўрганиш зарурлигини билдириб, вазирликка ҳужжатлар ва «лог файл»ларни тақдим этиш мажбуриятини юклади. Кейинги мажлис 2025 йил 4 сентябрга белгиланди.