«UzAuto Motors»нинг дебиторлик қарздорлиги 2,5 трлн сўмдан ошди
Шу билан бирга, компаниянинг омборларидаги маҳсулот ва товар-моддий захиралари ҳажми 11,73 трлн сўмдан 17,97 трлн сўмгача кўпайди.
«UzAuto Motors» АЖнинг харидорлар ва буюртмачилардан оладиган қисқа муддатли дебиторлик қарздорлиги 2026 йил 30 сентябрь ҳолатига кўра 2,55 триллион сўмга етди. Бу ҳақда Корпоратив ахборот ягона порталида (openinfo.uz) эълон қилинган компаниянинг учинчи чорак молиявий ҳисоботида маълум қилинди.
Маълумотларга кўра, ушбу кўрсаткич 2025 йил 31 декабрь ҳолатида 1,96 триллион сўмни ташкил этган эди.
Захиралар кўпайиши ва узоқ муддатли активлар пасайиши
Ҳисобот даврида компаниянинг жами жорий активлари 24,34 триллион сўмни ташкил этган. Бунда товар-моддий захиралари ҳажми 11,73 триллион сўмдан 17,97 триллион сўмгача ошган.
Шу билан бирга, автоишлаб чиқарувчининг узоқ муддатли активлари 12,25 триллион сўмдан 10,97 триллион сўмгача камайган. Жами активлар қиймати эса 31,75 триллион сўмдан 35,31 триллион сўмгача ошгани қайд этилган.
Қарз мажбуриятлари ва маъмурий харажатлар
Компаниянинг жорий мажбуриятлари 16,19 триллион сўмдан 17,89 триллион сўмгача кўпайган. Улар орасида етказиб берувчилар ва пудратчилар олдидаги қисқа муддатли қарздорлик 1,21 триллион сўмдан 286,63 миллиард сўмгача қисқарган бўлса, олинган бўнак (аванс)лар бўйича мажбуриятлар 834,77 миллиард сўмдан 1,62 триллион сўмга ошган.
Шунингдек, ҳисобот даврида «UzAuto Motors»нинг сотиш харажатлари 1,02 триллион сўмдан 1,17 триллион сўмгача кўпайган.
Маъмурий харажатлар эса 609,14 миллиард сўмдан 582,45 миллиард сўмгача камайган.
