Россия ва Украина ўртасидаги уруш давомида Россия томонда жанг қилган 118 000 дан ортиқ ҳарбий ҳалок бўлган. Улар орасида 500 дан зиёд чет эл фуқароси бор.
Россия армияси сафида жанг қилган хорижликлар 28 давлатдан экани қайд этилмоқда. Энг кўп қурбонлар, катта эҳтимол билан, Шимолий Корея фуқаролари бўлган.
Марказий Осиё давлатлари фуқаролари орасида Тожикистон ва Ўзбекистон фуқаролари етакчилик қилмоқда. Тожикистондан 72, Ўзбекистондан 66 киши ҳалок бўлган. Улардан кўпчилиги «Вагнер» хусусий ҳарбий компанияси билан шартнома тузиб, фронтга жўнатилган. 46 ўзбекистонлик ва 43 тожикистонлик қамоқдан озодликка чиқиш шартида урушда иштирок этган.
Ҳуқуқ фаолларининг таъкидлашича, Россия ҳукумати Марказий Осиёдан келган мигрантларни урушда қатнашишга мажбурлаётган ҳолатлар бор. Уларга Россия фуқаролигини тезлаштирилган тартибда бериш, кириш тақиқини олиб ташлаш каби ваъдалар берилган. Баъзи ҳолларда эса таҳдидлар билан мажбурланган.
Россия армияси сафида жанг қилган чет элликлар орасида Непал (70 киши), Гуржистон (63), ҳамда Шри-Ланка (16) фуқаролари ҳам бор. Африка давлатлари — Эфиопия, Замбия, Марказий Африка Республикаси, Танзания ва Тогодан ҳам ҳарбийлар жалб этилган.