1400 дан ортиқ кўп қаватли уй-жой рўйхатдан ўтмасдан қурилгани маълум бўлди

Ўзбекистонда 1400 дан ортиқ кўп қаватли уй-жой давлат рўйхатидан ўтмасдан қурилгани аниқланди. Бу ҳақда Дилмурод Қосимов Қонунчилик палатаси мажлисида қурилиш соҳасида назоратни кучайтиришга қаратилган қонун лойиҳаси муҳокамаси вақтида маълум қилди.

Сўнгги тўққиз йил давомида мамлакат бўйича жами 11 834 та кўп қаватли уй-жойнинг зилзилабардошлиги хатловдан ўтказилган. Ушбу жараёнда 2017–2024 йилларда қурилган 8 974 та уй-жой, 2025 йилда қурилиши режалаштирилган 2 559 та объект ҳамда фойдаланишга топширилган 301 та кўп қаватли бино қамраб олинган.

Хатлов натижасида 1 434 та уй-жой ҳеч қандай давлат рўйхатидан ўтмасдан барпо этилгани маълум бўлди. Шунингдек, 185 та бино-иншоотда тегишли рухсатномаларсиз қўшимча қават қурилгани аниқланган. Бу ҳолатлар қурилиш жараёнида ҳуқуқий ва техник талаблар бузилаётганини кўрсатади.

Маълум қилинишича, 2025 йил 1 июлдан ўзбошимчалик билан қурилган биноларни Қурилиш ва уй-жой коммунал хўжалиги соҳасида назорат қилиш инспекциясида рўйхатдан ўтказиш тўхтатилган. Шунга қарамай, ноқонуний қурилишлар сони яна 213 тага ошган.

Визуал ўрганишлар натижасида 1 346 та кўп қаватли уй-жойни инструментал техник текширувдан ўтказиш зарурлиги белгиланди. Ҳозиргача 778 та объект тўлиқ текширилган, 568 тасида эса ишлар давом этмоқда. Текширувлар жараёнида 142 та уй-жойни мустаҳкамлаш талаб этилиши, битта бино эса сейсмик жиҳатдан яроқсиз деб топилган.

Қоидабузарликлар учун 85 та лойиҳа ташкилотига нисбатан чора кўриш бўйича тақдимнома киритилган, улардан 8 тасининг лицензияси бекор қилинган. Шунингдек, 115 та ноқонуний бино белгиланган тартибда буздирилган, 98 та ҳолат юзасидан жиноят ишлари қўзғатилган.