16 та давлат ва Евроиттифоқ Паралимпия ўйинларининг очилиш маросимини бойкот қилди
Россия ва Беларус спортчиларининг ўз миллий байроқлари остида иштирок этишига рухсат берилгани сабабли қатор давлатлар 2026 йилги Қишки Паралимпия ўйинларининг очилиш маросимида қатнашишдан бош тортди.
Украина Ташқи ишлар вазири Андрий Сибигага кўра, 16 та давлат ва Европа Иттифоқи тантанали маросимни бойкот қилишга қарор қилган. Австралия ва Франция расмий вакиллари маросимда иштирок этмаслигини тасдиқлаган. Ушбу қарор Халқаро паралимпия қўмитасининг (ХПҚ) баҳсли қарорига нисбатан кескин норозилик белгиси ҳисобланади.
Халқаро паралимпия қўмитаси давом этаётган урушга қарамай, олти нафар россиялик ва тўрт нафар беларуслик спортчига нейтрал мақомда эмас, балки ўз мамлакатлари миллий байроқлари остида қатнашишга рухсат берган. Эстония, Финляндия, Исландия, Латвия, Литва, Полша, Руминия ва Швеция каби давлатлар қўмитанинг ушбу қарорини «шармандали» деб атаб, халқаро ҳуқуққа ҳурмат кўрсатишга чақирган.
Протестга қўшилган жамоалар
Украина терма жамоаси Веронада бўлиб ўтадиган очилиш маросимида иштирок этмаслигини эълон қилди. Уларга протест белгиси сифатида Австрия, Руминия ва Буюк Британия жамоалари ҳам қўшилди. Шунингдек, Канада, Хорватия, Чехия, Эстония, Финландия, Германия, Латвия, Литва, Нидерландия ва Полша вакиллари ҳам маросимни бойкот қилишга қарор қилган.
Ўйинлар муддати
2026 йилги Қишки Паралимпия ўйинлари 6 мартдан 15 мартга қадар Италиянинг Милан ва Кортина-д’Ампеццо шаҳарларида бўлиб ўтади.
Спорт оламидаги ушбу сиёсий кескинлик ўйинларнинг бошланишига жиддий таъсир кўрсатмоқда. Вазир Сибига ҳамкорларнинг бундай бирдамлиги спорт тинчлик, адолат ва халқаро қонун устуворлигига хизмат қилиши кераклигини англатишини таъкидлади.