2025 yilda kriptovalyuta o‘g‘irliklari rekord darajaga chiqdi

2025 yilning ilk olti oyi kriptovalyuta tarixida eng yirik o‘g‘irliklarni qayd etdi. TRM Labs tahliliga ko‘ra, xakerlar bu davrda jami $2,1 milliard kriptovalyuta mablag‘ini noqonuniy yo‘l bilan o‘zlashtirgan. Eng diqqatga sazovor jihat shundaki, bu yo‘qotishlarning taxminan 70 foizi Shimoliy Koreya bilan bog‘liq xakerlik guruhlari hisobiga to‘g‘ri keladi. Ularning joriy yilda o‘zlashtirgan mablag‘i $1,6 milliardga yaqinlashgan. TRM Labs bu holatni Shimoliy Koreyaning strategik siyosiy vositasi sifatida baholagan. Yil boshida sodir bo‘lgan Bybit birjasiga qilingan hujum kriptovalyuta tarixida eng yirik o‘g‘irliklardan biri sifatida qayd etildi. Ushbu hujum natijasida taxminan $1,5 milliardlik Ethereum va unga bog‘liq aktivlar qo‘lga kiritilgan. Tergov natijasiga ko‘ra, hujumga ko‘p foydalanuvchi talab qiladigan hamyon provayderi Safe kompaniyasi xodimining ish kompyuteri orqali yo‘l ochilgan. 4 fevral kuni sodir bo‘lgan bu hodisa ortida ham Shimoliy Koreya xakerlari turgani tasdiqlangan. Mutaxassislarning fikricha, bu voqea kriptovalyuta xavfsizligi borasida butun dunyodagi yondashuvlarni qayta ko‘rib chiqishga majbur qilgan. TRM Labs hisobotiga ko‘ra, Shimoliy Koreya xalqaro sanksiyalar sharoitida kripto mablag‘larini o‘z yadroviy dasturlarini moliyalashtirish uchun faol qo‘llamoqda. Joriy yilda kripto o‘g‘irliklarining 80 foizi infratuzilma ustidan nazoratni egallash orqali amalga oshirilgani ta’kidlanmoqda. Ushbu tendensiya kriptovalyuta sohasida xavfsizlik choralarini yanada kuchaytirish zarurligini ochiq ko‘rsatmoqda.