2026 yilda alkogol, tamaki va neft mahsulotlarining aksiz solig‘i o‘zgaradi

O‘zbekiston Iqtisodiyot va moliya vazirligi e’lon qilgan 2026–2028 yillar byudjetnoma loyihasida kelgusi yil uchun soliq-aksiz siyosatining yo‘nalishlari ochiqlandi. Hujjatga ko‘ra, aksiz stavkalari sog‘lom turmush tarzini rag‘batlantirish, bozorda teng raqobatni ta’minlash va Jahon savdo tashkiloti talablariga moslashish maqsadida qayta belgilanmoqda.

Alkogol mahsulotlari va etil spirti

2026 yil 1-fevraldan mahalliy va import alkogol mahsulotlari uchun stavkalar bosqichma-bosqich birxillashtiriladi. Aroq va konyakka mahalliy mahsulot uchun 48 ming, import uchun 60 ming so‘m stavka belgilanadi.

Vino va pivo mahsulotlari bo‘yicha ham ikki bosqichli tartib joriy qilinadi. Iyuldan boshlab barcha mahsulotlar uchun yagona stavka qo‘llanadi: tabiiy vino uchun 10 ming, boshqa vinolar uchun 12 ming va pivo uchun 4 ming so‘m. Shuningdek, etil spirtining bosh fraksiyasi uchun aksiz 15 mingdan 5 ming so‘mga tushirilishi taklif etilmoqda.

Tamaki mahsulotlari

2026 yil 1-fevraldan sigaretalar, chilim tamakisi, o‘rama tamaki, qizdiriladigan stiklar va veyplar bo‘yicha aksiz stavkalari 7 foizga oshiriladi.

Bunda mahalliy va import qilinadigan mahsulotlar uchun yagona stavkalarni belgilash taklif etilmoqda:

1000 dona sigareta uchun 365 000 so‘m;

Bitta sigara uchun 21 500 so‘m;

1 kg chilim va o‘zi o‘raydigan tamaki uchun 642 000 so‘m;

1 kg isitiladigan tamaki tayoqchasi uchun 481 500 so‘m;

1 ml veyp suyuqligi uchun 2 140 so‘m.

Tarkibida shakar bo‘lgan va energetik ichimliklar

2026 yil 1-apreldan shakarli va shirinlashtiruvchi moddalar bo‘lgan ichimliklar, shuningdek energetik ichimliklarga progressiv soliq tartibi joriy etiladi.

— Tarkibida 100 ml shakar bo‘lgan ichimliklar uchun: 5 g gacha - 1 litri uchun 500 so‘m (amaldagi stavka), 5 g dan 10 g gacha - 1 litri uchun 515 so‘m, 10 g dan ortiq - 1 litri uchun 535 so‘m;

— Tarkibida shakar emas, balki boshqa shirinlashtiruvchi moddalar bo‘lgan ichimliklar uchun - 1 litri uchun 500 so‘m;

— Energetik va tetiklantiruvchi ichimliklar uchun - 1 litri uchun 2 150 so‘m.

Umumiy ovqatlanish sohasida tayyorlanadigan ichimliklar esa aksizdan istisno qilinadi.

Neft mahsulotlari

2026 yil 1-apreldan neft mahsulotlarini ishlab chiqarish va yakuniy iste’molchilarga sotishda aksiz solig‘i 7 foizga oshiriladi. Polietilen granulalari va tabiiy gaz uchun amaldagi stavkalar o‘zgarishsiz qoladi.

Ushbu o‘zgarishlar soliq tushumlarining barqarorligini saqlash, iste’mol bozorini tartibga solish va salomatlikka zararli mahsulotlar iste’molini kamaytirishga qaratilgan.