2026 йилдаги кучли армиялар рейтинги: Ўзбекистон яна Марказий Осиёда етакчи

Ўзбекистон Қуролли кучлари 2026 йил учун эълон қилинган Global Firepower халқаро рейтингида Марказий Осиё мамлакатлари орасида энг юқори ўринни эгаллади. Рейтингга киритилган 145 давлат орасида Ўзбекистон беш поғонага кўтарилиб, 53-ўриндан жой олди. Бу натижа мамлакатни минтақадаги асосий рақиби ҳисобланган Қозоғистондан олдинга чиқарди.

Таққослаш учун, Қозоғистон ушбу рейтингда 58-ўринни эгаллаган. Туркманистон 78-ўринга, Тожикистон 100-ўринга, Қирғизистон эса 109-ўринга жойлашган. Шу тариқа, Ўзбекистон Марказий Осиёда ҳарбий қудрат бўйича мутлақ етакчи сифатида баҳоланди.

Асосий устунликлари

Ўзбекистон армиясининг асосий устунликларидан бири — кенг сафарбарлик ресурси ҳисобланади. Мамлакат аҳолисидан қарийб 16 миллион киши ҳарбий хизматга яроқли деб баҳоланган. Қуролли кучларда тахминан 120 минг нафар ҳарбий хизматчи фаолият юритади ва уларнинг асосий қисми қуруқликдаги бўлинмалар ҳиссасига тўғри келади.

Техника ва қурол-яроғ кўрсаткичлари ҳам юқори баҳоланган. Армия ихтиёрида 470 та танк ҳамда 8 692 та зирҳли транспорт воситаси мавжуд. Артиллерия бўлинмаларида 177 та ўзиюрар қурол бор бўлиб, бу кўрсаткич бўйича Ўзбекистон дунё миқёсида 23-ўринни эгаллаган.

Ҳарбий-ҳаво кучлари таркибида жами 159 та ҳаво транспорти мавжуд. Улардан 101 таси вертолёт бўлиб, 34 та ҳужум вертолёти сони билан мамлакат ушбу йўналишда дунёда 20-ўринда қайд этилган. Бу кўрсаткичлар Ўзбекистоннинг ҳарбий салоҳияти изчил равишда мустаҳкамланиб бораётганини кўрсатади.

Маълумот учун: Ўзбекистон ўтган йили дунё армиялари ичида 58-ўринда эди.

Рейтинг етакчилари

Янгиланган рейтингга кўра, дунё миқёсида энг кучли армиялар ўнталигига: АҚШ, Россия, Хитой, Ҳиндистон, Жанубий Корея, Франция, Япония, Буюк Британия, Туркия ва Италия киритилган. Ушбу мамлакатлар ҳарбий қудрат бўйича барқарор етакчи сифатида баҳоланмоқда. Рейтингнинг энг қуйи ўринларида эса Бутан, Белиз ва Марказий Африка Республикаси каби давлатлар жой олган.