Afg‘oniston AQSH, Rossiya va Xitoy o‘rtasidagi raqobat maydoni emas — «Tolibon» vaziri

Kecha, 18 avgust kuni Afg‘onistondagi «Tolibon» muvaqqat hukumati mudofaa vaziri Muhammad Yoqub Mujohid mintaqaviy va jahon kuchlarini Afg‘onistonga nisbatan «g‘arazli niyatlardan» voz kechishga chaqirdi. Bu haqda Amu.tv xabar berdi. Uning ta’kidlashicha, amaldagi hokimiyat islom tamoyillari asosida yaxshi qo‘shnichilik munosabatlarini o‘rnatishga intilmoqda va afg‘oniston AQSH, Rossiya hamda Xitoy o‘rtasidagi raqobat maydoniga aylanishini istamaydi. «Katta kuchlar qarama-qarshilik yo‘li bilan emas, balki taraqqiyot – to‘g‘onlar, yo‘llar, zavodlar qurish, energetika loyihalarini ishga tushirish yo‘lida raqobatlashishi kerak», - dedi vazir Afg‘onistonning Mustaqillik kuni munosabati bilan o‘tkazilgan marosimda so‘zlagan nutqida. Mujohid, shuningdek, afg‘onlar o‘tmishda bir necha bor mustaqillikni saqlab qola olmaganini aytdi, biroq u «Tolibon»ning 2021 yil avgustida hokimiyatga qaytishini mustaqillikning yangi shakli deb atadi. Uning so‘zlariga ko‘ra, fitna va bo‘linishlarning oldini olish uchun mamlakatga birdamlik kerak, hukumat va xalq yoki fuqarolar o‘rtasida bo‘linish urug‘uni sepmoqchi bo‘lganlarni aniqlash kerak. Tashqi ishlar vaziri Amir Xon Muttaqiy o‘z nutqida Afg‘oniston asr davomida o‘z mustaqilligini saqlab qola olmaganini ta’kidladi: Britaniyadan ozod bo‘lgan qirol Omonullaxon ham, Sovet qo‘shinlari chiqib ketganidan keyin ham mujohidlar yetakchilari. U, shuningdek, qo‘shni davlatlarni amaldagi hukumatga putur yetkazishga qaratilgan uchrashuvlar o‘tkazishdan ogohlantirdi, kuzatuvchilar buni Islomobodda bo‘lajak konferensiyaga ishora sifatida talqin qilishdi. Pokiston kelasi hafta Afg‘oniston bo‘yicha o‘nlab faollar va siyosiy arboblar ishtirokidagi yig‘ilishga mezbonlik qilishga hozirlik ko‘rmoqda. Tadbir norasmiy bo‘lib o‘tadi va Pokiston hukumati bu haqda hozircha izoh bermagan.