Амалдаги президент ва дунёнинг бойлари: Эпштейн ҳужжатлари яна нималарни очди?

АҚШ Адлия вазирлиги 30 январ куни шов-шувли Жеффри Эпштейн файлларини яна бир қисмини оммага эълон қилди. Бу тўпламга 3 миллион саҳифа, 180 минг расм ва 2 минг видео киритилган. Файлларда машҳур шахслар Илон Маск, Билл Гейтс, Ричард Брансон ва Доналд Трамп номлари учрайди. Доналд Трамп номи ҳужжатларда 3 минг марта тилга олинган, бироқ Адлия вазирлиги ва таҳлилчилар таъкидлашича, уларнинг кўпчилиги тасдиқланмаган ёки далилсиз. Файллар фақат шахсларнинг Жеффри Эпштейн билан алоқада бўлган вақтларини кўрсатади, аммо бу жиноят содир этилганини ҳозирча исботламайди.

Доналд Трамп журналистларнинг Жеффри Эпштейн файлларида у ва бошқа машҳурларнинг расмлари тарқалгани билан боғлиқ саволларига қуйидагича жавоб берган:

«Мен уларни кўрмадим, лекин у одам ҳақида ҳамма билади. Унинг ҳамма билан тушган расмлари бор. Деярли юзлаб одамларнинг у билан расмлари бор. Бу унчалик ҳам муҳим эмас, мен бу ҳақида ҳеч нарса билмайман. Жеффри Эпштейн билан ҳеч қандай алоқам йўқ. Агар сиз Адлия вазирлиги берган 3 миллион бетлик файлларга қарасангиз, кўплаб исмларни кўрасиз: Билл Клинтон, Билл Гейтс ва бошқа кўплаб одамлар бор. Бу ерда кўплаб саволлар бор, лекин ҳеч бири менга алоқадор эмас».

Доналд Трамп бундай саволларни берган журналистларни ҳам аяб ўтирмайди. Масалан, у Эпштейн файллари ҳақида сўраган CNN журналистини танқид қилган:

«Сиз жуда ёмон журналистсиз, сиз дунёдаги энг ёмон репортёрсиз. Сизга ўхшаганлар сабаб CNN ҳеч қандай рейтингларга эга эмас. Мен сизни 10 йилдан бери биламан, лекин ҳеч қачон табассум қилганингизни кўрмаганман. Биласизми, нега сиз кулмайсиз? Чунки сиз ҳақиқатни айтмаётганингизни биласиз».

BBC хабарига кўра, янги эълон қилинган рўйхатда Доналд Трамп, Жеффри Эпштейн ва бошқа таниқли шахсларга нисбатан бир қатор жинсий тажовуз айбловлари келтирилган. Бунга жавобан Трамп Эпштейн билан ўнлаб йиллар олдин алоқани узганини айтади ва у билан боғлиқ ҳар қандай ноқонунийликни доимий равишда инкор этиб келади. Шунингдек, у Эпштейндан жабрланганлар томонидан ҳеч қандай жиноятда айбланмаганини таъкидлайди.

Илон Маск

Илон Маск аввалроқ Жеффри Эпштейн уни шахсий оролига таклиф қилганини ва у бу таклифни рад этганини айтган эди. Бироқ яқинда ошкор қилинган ҳужжатлар бу баёнотга зид ҳолатни кўрсатмоқда.

2012 йилга оид e-mail ёзишмаларда Жеффри Эпштейн Илон Маскдан оролга бориш учун неча кишилик вертолёт керак бўлишини сўраган. Маск бунга жавобан сафарга фақат ўзи ва ўша пайтдаги рафиқаси Талула Райли боришини ёзган. Шунингдек, у қайси кеча «Энг ёввойи базм» бўлиши мумкинлигини сўраган.

Бу эмаил ёзишмалар Маскнинг 2023 йилда айтган «Эпштейн оролидаги базмга боришни қатъиян рад этганман», деган баёнотига тўғридан тўғри зид келади. Чунки ҳужжатларда Маск ташрифни рад этаётган эмас, аксинча, сафарни мувофиқлаштиришга уринаётгани акс этган. Аммо ҳозирча Илон Маск Эпштейн оролига борганини тасдиқловчи далил йўқ.

Ҳужжатлар эълон қилингач, Маск «Х» (собиқ «Twitter») тармоғида баёнот бериб, шундай деган:

«Мен ҳеч қачон Эпштейн базмларида қатнашмаганман ва Эпштейн билан жиноят содир этган шахсларнинг жазоланишини бир неча бор талаб қилганман. Адолат ҳужжатларни ошкор қилиш эмас, балки Эпштейн билан боғлиқ жиноятларни содир этган шахсларнинг реал жавобгарликка тортилишидир».

Билл Гейтс

Мелинда Френч Гейтс  собиқ эри Билл Гейтснинг марҳум молиячи ва жинсий жиноятлар учун судланган Жеффри Эпштейн билан алоқалари ҳақидаги янги ҳужжатлар эълон қилингач, «чуқур ва тушунтириб бўлмас қайғуюни ҳис қилганини айтди. У бу ҳақда NPRʼнинг «Wild Card» подкастидаги суҳбатда гапирган.

Мелинда Гейтс 2021 йилда Билл Гейтс билан ажрашган. У янги ҳужжатлар билан боғлиқ саволларга жавоб бериш ўзига эмас, балки бевосита Билл Гейтс ва ушбу жараёнда иштирок этган шахсларга тегишли эканини таъкидлади. Унинг айтишича, у бу «ифлос можаролар»дан узоқда бўлгани учун хурсанд.

Мелинда Гейтс бу янги маълумотлар унинг никоҳидаги «жуда оғриқли даврлар»ни яна ёдга солганини айтди. Шу билан бирга, у Эпштейн томонидан жабрланган қизларнинг тақдири «тасаввур қилиб бўлмас даражада фожиали» эканини билдириб, улар учун адолат қарор топишига умид қилаётганини айтди.

АҚШ Адлия вазирлиги (DOJ) берган ҳужжатлар орасида Эпштейннинг 2013 йилга оид, Билл Гейтсга ёзилгандек кўринган, аммо ҳеч қачон юборилмаган e-mail қораламалари ҳам бор. Ушбу матнларда Гейтс оиласидаги келишмовчиликлар, бизнес масалалари ва соғлиқ билан боғлиқ хавотирлар тилга олинган. Мазкур e.mailʼларни ким ёзгани аниқ эмас. Аммо эмаилда Гейтс жинсий йўл билан юқадиган касаллик юқтиргани ва бу ҳақда рафиқасига билдирмасдан унга антибиотик беришга урингани айтилади.

Миллиардер файллар эълон қилингач, Эпштейн нимани ўйлаганини тушунмаслигини айтиб, шундай деган:

«У билан ўтказган ҳар бир дақиқамдан афсусдаман. Буни қилганим учун узр сўрайман».

Билл Гейтснинг вакили CNNʻга берган баёнотида у Эпштейн билан боғлиқ ҳар қандай ноқонуний ёки номақбул хатти-ҳаракатларни қатъиян рад этишини билдирган.

Билл Гейтснинг ўзи эса Австралиянинг «Nine news» телеканалига берган интервюсида ҳужжатлардаги эмаил Эпштейн томонидан ёзилганини, аммо ҳеч қачон юборилмаганини ва ундаги маълумотлар нотўғри эканини айтган. Гейтс ўз сўзида Эпштейннинг оролига ҳеч қачон бормаганини, у ерда аёллар билан учрашмаганини ва у билан фақат кечки овқатлар даражасида мулоқот қилганини таъкидлаган.

Сўнгги йилларда Билл Гейтс Эпштейн билан алоқада бўлганидан бир неча бор очиқчасига афсусланишини билдирган.

Ричард Брансон

2013 йилда миллиардер Ричард Брансон Жеффри Эпштейн билан шахсан учрашган. Орадан бир кун ўтиб, 11-сентябрь куни Брансон Эпштейнга эмаил юборган. Эмаилда Брансон учрашувдан мамнунлигини билдирган ва Эпштейнни яна кўришни хоҳлашини ёзган. У хабарда Эпштейн атрофидаги аёллар гуруҳини «ҳарaм» деб атаган ва Эпштейн яна келганда «ўша ҳарамни ҳам олиб келиши»ни ёзган.

Ричард Брансон асос солган «Virgin Group» компанияси ушбу e-mailʻга изоҳ бериб, Брансон «ҳарам» сўзини Эпштейн ишлатган атама сифатида, яъни вояга етган аёллар гуруҳи маъносида қўллаганини билдирган. Компания таъкидлашича, агар Брансон Эпштейннинг жиноятлари ва фаолиятининг асл моҳиятини ўша пайтда билганида, у на бу сўзни ишлатган бўларди, на Эпштейн билан алоқада бўлган бўларди.

Ҳозирча Ричард Брансон Эпштейн билан боғлиқ жиноятларда айбланмаган. Унинг исми фақат ёзишмалар ва учрашувлар контекстида тилга олинади.