AQSH Kirkning o‘limidan quvonganlarning vizalarini bekor qildi

AQSH Davlat departamenti ijtimoiy tarmoqlarda konservativ siyosiy faol Charli Kirkning o‘ldirilishini ma’qullaganini bildirgan olti nafar xorijlik fuqaroning vizasini bekor qildi. Bu haqda departament o‘zining X sahifasida ma’lum qildi. «Prezident Donald Tramp va Davlat kotibi Marko Rubio immigratsiya qonunchiligimizni amalga oshirish orqali chegaralarimiz, madaniyatimiz va fuqarolarimizni himoya qiladi. Fuqarolarimizning o‘ldirilishini nishonlashda Amerikaning mehmondo‘stligidan foydalangan xorijliklar deportatsiya qilinadi», - deyiladi Davlat departamenti bayonotida. Ushbu shaxslar Argentina, Janubiy Afrika, Meksika, Braziliya, Germaniya va Paragvay fuqarolaridir. Bayonotda, shuningdek, olti nafar xorijlik fuqaroning har birining bayonotlaridan misollar keltirilib, ularda Kirkning o‘ldirilishini ma’qullaganliklari va marhumni «fashist», «irqchi» va «ksenofob» deb ta’riflaganlar. Davlat departamenti, shuningdek, ijtimoiy tarmoqlarda faolga suiqasd uyushtirishni qo‘llab-quvvatlagan va uni oqlaydigan AQSH vizasi egalarini aniqlashni davom ettirish niyatida ekanini bildirdi. Seshanba kuni ertalab Tramp o‘limidan so‘ng Kirkni Prezidentning «Ozodlik» medali bilan taqdirlagan edi. 31 yoshli Kirk 10 sentyabr kuni Yuta shtatining Orem shahridagi universitetda nutq so‘zlayotganida otib ketib, shifoxonada vafot etdi. Konservativ faol Tramp tarafdori edi. Kirk qotilligida gumon qilingan Tayler Jeyms Robinson 11 sentyabr oqshomida hibsga olindi va unga yetti moddada ayblov qo‘yildi. Yuta okrugi prokurori Robinson uchun o‘lim jazosini talab qilishga va’da berdi. AQSH Davlat departamenti 2019 yildan beri viza uchun murojaat etuvchilardan o‘z arizalari bo‘yicha ijtimoiy tarmoqlardagi ma’lumotlarni baham ko‘rishlarini talab qilgan bo‘lsa-da, iyun oyida talaba abituriyentlar hukumat tekshiruvi uchun barcha ijtimoiy tarmoqlardagi akkauntlarini ochiq qilishlari shartligi haqidagi qoidani qo‘shib qo‘ydi. Bu qaror Tramp ma’muriyati davrida AQSH bo‘ylab universitet va kollejlar kampuslarida Falastin tarafdori bo‘lgan norozilik namoyishlarini qo‘llab-quvvatlagan xalqaro talabalarning bostirilishi ortidan amalga oshirildi. Avgust oyida Davlat departamenti rasmiysi Fox News telekanaliga bu yil 6000 dan ortiq talaba vizalarini bekor qilganini aytdi. Fox News xabariga ko‘ra, talabalar AQSH qonunlarini buzgani uchun vizaning uchdan ikki qismi bekor qilingan, 200 dan 300 gacha esa «terrorizmni» qo‘llab-quvvatlagani yoki «HAMAS guruhi uchun mablag‘ yig‘ish kabi xatti-harakatlar» bilan shug‘ullangani uchun bekor qilingan.