AQSH samolyoti Rossiya chegarasi yaqiniga bomba tashladi

Amerikaning B-2 strategik bombardimonchi samolyoti Norvegiya shimolida, Rossiya Arktika chegarasidan atigi bir necha yuz kilometr uzoqlikda kemaga qarshi qurollarni sinovdan o‘tkazdi. Bu haqda Newsweek yozmoqda. Ma’lumotlarga ko‘ra, 3 sentyabr kuni samolyot Norvegiya dengizida, Annyoyya oroli yaqinida yuqori aniqlikdagi bombalarni tashlagan. Ushbu mashg‘ulotlar AQSH harbiy-dengiz guruhi va uning NATO bo‘yicha ittifoqchilarining Barens dengizidagi operatsiyasi bilan parallel ravishda o‘tkazilgan, nashr ma’lumotlariga ko‘ra, u yerda Rossiya harbiylari alyans kemalarining harakatlanishini diqqat bilan kuzatgan. AQSH Havo kuchlari ma’lumotiga ko‘ra, B-2 bombardimonchisi QUICKSINK deb nomlangan takomillashtirilgan boshqariluvchi o‘q-dorilardan foydalangan. U dengizdagi suzuvchi ob’ektlarni yo‘q qilish uchun ishlab chiqilgan. Sinovlar jarayonida ikki xil qurol qo‘llanilgan: 500 funtlik GBU-38 bombasi va 2000 funtlik GBU-31 bombasi. Yangi tizim o‘z-o‘zidan yo‘l topuvchi bosh qismi bilan jihozlangan bo‘lib, u orqali ham statsionar, ham harakatlanayotgan dengiz maqsadlarini samarali yo‘q qilish mumkin. Havo kuchlari tadqiqot laboratoriyasi vakillari ta’kidlashicha, QUICKSINK havodan kemalarni yo‘q qilishning arzon imkoniyatini taqdim etadi. Uning ta’siri torpedalar qo‘llanishiga teng, ammo ko‘proq tezlik va keng maydonda qo‘llash imkoniyatini beradi. Nashr ma’lumotiga ko‘ra, Norvegiya harbiylari operatsiyaga to‘rtta F-35 harbiy samolyoti va P-8 patrul samolyotini jalb etgan. Nashr etilgan suratlardan birida, suvosti kemasidan olingan tasvirda, o‘q-dorining suzuvchi kemaga urilgani aks etgan. The War Zone ma’lumotlariga ko‘ra, GBU-31 turidagi bomba qo‘llangan. Newsweek ta’kidlashicha, bu mashqlar AQSHning Rossiya va Xitoy tomonidan kelayotgan dengiz tahdidlariga qarshi kurashishni kuchaytirish harakatlarining bir qismi hisoblanadi. Nashr, shuningdek, AQSHning yangi kemalarga qarshi raketalar va QUICKSINK kabi takomillashtirilgan o‘q-dorilarni yaratish dasturlari faol rivojlanayotganini alohida qayd etgan. Norvegiyada o‘tkazilgan sinovlar B-2 bombardimonchisi bortidagi mazkur turdagi qurol uchun uchinchi marta amalga oshirildi: avvalroq 2000 funtlik bomba 2024 yil iyulida Gavayidagi dengiz mashqlarida, 500 funtlik bomba esa Floridada qo‘llangan edi. AQSH Havo kuchlari ta’kidlashicha, bu missiya nafaqat o‘q-dorilarning yuqori samaradorligini tasdiqladi, balki bombardimonchining asosiy ustunliklarini — yashirin harakatlanishini, uzoq masofaga parvoz qilish imkoniyatini va turli qurollarni qo‘llashdagi universalligini ham namoyish etdi.