AQSH xalqaro talabalarsiz 43,8 mlrd dollardan ayrilishi mumkin

Xususan, Kaliforniya, Nyu-York va Texas shtatlari eng ko‘p xalqaro talabalarni qabul qilgan. Kaliforniyadagi 140 mingdan ortiq talabalar 6,4 mlrd dollar foyda keltirgan. Nyu-Yorkda 135 ming talabadan 6,3 mlrd dollar, Texasda esa 2,5 mlrd dollarlik iqtisodiy foyda qayd etilgan. Biroq so‘nggi paytlarda AQSH hukumati xalqaro talabalarga nisbatan yangi cheklovlar joriy qilmoqda. Masalan, may oyida AQSH Davlat departamenti barcha elchixonalarda talabalar uchun yangi viza belgilanishini vaqtincha to‘xtatdi. Shuningdek, ijtimoiy tarmoqlar orqali nazorat va qonuniy xavflar talabalarning mamlakatdagi mavqeini murakkablashtirmoqda. NAFSA xalqaro ta’lim tashkiloti rahbari Fanta Ov ta’kidlaganidek, AQSHning ta’lim tizimiga bo‘lgan ishonch susaymoqda. Uning so‘zlariga ko‘ra, talabalar barqarorlik va ishonchli tizim izlamoqda. Agar bu jarayon davom etsa, AQSH o‘z mavqeini yo‘qotishi mumkin. Xalqaro talabalar orasida eng ommalashgan mutaxassisliklar — matematika va kompyuter fanlari, muhandislik, biznes va boshqaruv. Ular orasida yarmiga yaqini magistraturada tahsil olmoqda, qolganlari bakalavriat, amaliyot va boshqa dasturlarda qatnashmoqda. AQSHdagi talabalarning bir qismi o‘z yurtiga qaytib milliy rivojlanishga hissa qo‘shsa, boshqalari mamlakatda qolib soliq to‘lash, ish o‘rinlari yaratish va iqtisodiyotni rivojlantirishda ishtirok etadi. Biroq talabalar soni kamayishi universitetlar uchun moliyaviy muammolarni keltirib chiqarishi mumkin. Hozirda Germaniya, Yaponiya, Janubiy Koreya va Yaqin Sharq mamlakatlari xalqaro talabalarni faol ravishda qabul qilmoqda. AQSH esa ular bilan raqobatda o‘z o‘rnini yo‘qotishi xavfi ostida turibdi.