Arab davlatlari rahbarlarining aksariyati Moskvaga borishdan bosh tortdi

15 oktyabr kuni Moskvada o‘tkazilishi rejalashtirilgan Rossiya-Arab sammiti bo‘lib o‘tmaydi. Bloomberg xabar berishicha, Rossiya prezidenti Vladimir Putinning Arab davlatlari ligasi (ADL) rahbarlari bilan uchrashuvi asosiy ishtirokchilarning Rossiyaga tashrif buyurishdan bosh tortishi sababli bekor qilingan. Qayd etilishicha, 15 oktyabr kuni bo‘lib o‘tadigan forumga taklif etilgan 22 arab davlati rahbarlaridan faqat Suriya prezidenti Ahmad ash-Shara va Arab Ligasi rahbari ishtirokini tasdiqlagan. "Saudiya Arabistoni, Misr va Birlashgan Arab Amirliklari kabi yirik mintaqaviy kuchlar buni amalga oshirmagan", - dedi Bloomberg manbalari. Putinning o‘zi juma kuni AQSH prezidenti Donald Tramp tashabbusi bilan tuzilgan G‘azo tinchlik kelishuviga “aralashuvni istamagani uchun” sammitni kechiktirishni taklif qilganini aytdi. “Agar Donald (Donald Tramp – tahr.) o‘zi rejalashtirgan hamma narsaga erishsa... bu chinakam tarixiy voqea bo‘ladi”, - dedi Putin Tojikistonda jurnalistlar bilan suhbatda. Tahlilchilar Bloomberg'ga xabar berishicha, sammitda qatnashishdan ochiqdan-ochiq voz kechish arab dunyosining katta qismi Rossiyaning mintaqadagi qo‘llab-quvvatlash va ta’sirini ko‘rsatish tashabbuslarida ishtirok etishdan ko‘ra, Tramp bilan aloqalarni mustahkamlashga ko‘proq qiziqish bildirayotganidan dalolat berishi mumkin. Bloomberg manbasi kutilmagan kechiktirishni "umidsizlantiruvchi" deb baholadi, ammo tadbir keyinroq o‘tkazilishiga ishonch bildirdi. Kreml bayonotida aytilishicha, sammit "keyinroq kelishiladigan muddatga" ko‘chirilgan.