Арқадағ шаҳрида ерости сувлари суғориш учун фойдаланиляпти
Туркманистоннинг Арқадаг шаҳрида қурилиш доирасида ёмғир ва ерости сувларини йиғиш ҳамда қайта ишлатиш тизими амалга оширилмоқда.
© turkmenistaninfoТуркманистоннинг Арқадағ шаҳрида ёмғир ва ер ости сувлари яшил ҳудудларни суғориш учун фойдаланилмоқда. Бу ҳақда Дунё шаҳарлари форуми (WUF13) доирасида Боку шаҳрида ўтказилган тадбирда шаҳар ҳокими ўринбосари Назар Жойтиев маълум қилди.
Унинг айтишича, Туркманистонда сув ресурсларига алоҳида эҳтиёткорлик билан ёндашилади ва бу шаҳарсозлик лойиҳаларида ҳам инобатга олинади.
Ҳозирги кунда шаҳар қурилишининг иккинчи босқичи доирасида тозаланган оқова сувлардан қайта фойдаланиш ишлари олиб борилмоқда. Ушбу сувлар фақат Арқадағда эмас, балки яқин атрофдаги аҳоли пунктларида ҳам суғориш учун ишлатилади, деди у.
Озарбайжон тажрибаси
Шу форумда Арқадағ шаҳри қурилиш қўмитаси вакили Ирина Гришкова ҳам Озарбайжоннинг «яшил энергия» соҳасидаги тажрибаси Туркманистонда жорий этилаётганини маълум қилди.
Унинг сўзларига кўра, Озарбайжонда қайта тикланувчи энергия манбалари (ҚТЭ)га катта эътибор қаратилади ва Туркманистон ҳам бу тажрибани ўрганиб, тегишли қадамлар ташламоқда. Ҳозирда Арқадағ шаҳрининг иккинчи босқичи доирасида темирйўл вокзали ва автовокзал каби йирик объектларда қуёш энергиясидан фойдаланилмоқда. Бундай ёндашув электр тармоғига тушадиган юкламани камайтиради ва атмосферага чиқиндилар миқдорини қисқартиради.
Шунингдек, шаҳар қурилишида ёмғир сувларини қайта фойдаланиш тизими биринчи марта жорий этилган. Йиғилган ёмғир сувлари дастлаб тозаланиб, кейин махсус ҳавзаларга йўналтирилади ва охир-оқибат яшил ҳудудларни суғоришда ишлатилади. Бундан ташқари, қурилиш вақтида аниқланган ерости сувлари махсус дренаж тизими орқали йиғилиб, қайта суғориш учун қайта ишлатилмоқда.
