БАА соҳиллари яқинида кема қўлга олинди
Ҳўрмуз бўғози атрофидаги таранглик фонида яна бир денгиз ҳодисаси қайд этилди. «Bloomberg» маълумотига кўра, БАА яқинидаги кема номаълум шахслар томонидан олиб кетилган.
© Foto: AnadoluБирлашган Араб Амирликлари соҳиллари яқинида номаълум шахслар томонидан кема қўлга олинган ва ҳозир у Эрон сувлари томон йўл олган. Бу ҳақда «Bloomberg» Британиянинг Денгиз савдо операциялари бошқармаси (United Kingdom Maritime Trade Operations, UKMTO) маълумотларига таяниб хабар берди.
Ҳозирча қайси кема ҳақида сўз бораётгани аниқланмаган. UKMTO маълумотига кўра, у Фужайра соҳиллари яқинида лангар ташлаб турган. «Bloomberg» қайд этишича, ҳодиса Ҳўрмуз бўғози орқали ўтаётган кемалар сони ортиб бораётган бир пайтда юз берган. Бир неча кун аввал Эрон ушбу денгиз йўлагидан кемалар ўтишининг янгиланган тартибини тақдим этган эди.
Олдинги ҳодисалар
Аввалроқ дунё нефт экспортининг тахминан 20 фоизи Ҳўрмуз бўғози орқали ташиларди. Аммо АҚШ ва Исроилнинг Эронга қарши уруши бошланганидан кейин транзит кескин қисқарди. Айрим кемалар бўғоздан ўтишга уринганида ҳужумларга учраган.
Минтақада тижорий кемани қўлга олиш билан боғлиқ аввалги ҳодиса 8-май куни содир бўлган. Эрон Уммон кўрфазида «Ocean Koi» танкерини қўлга олганини маълум қилган. Теҳронга кўра, у Эрон нефтини ташиган.
Феврал ойида АҚШ ушбу танкерга қарши санкциялар жорий қилган ва уни Эроннинг «яширин флоти» таркибига киритган эди. Кемачилик маълумотлар базасига кўра, танкер Хитой компанияси бошқарувида бўлган.
