Бир кунда 1,3 трлн йўқотиш: Трампнинг геосиёсий таҳдидлари инвесторларни чўчитмоқда
«S&P 500» индекси 2,1 фоизга тушди — бу сўнгги уч ойдаги энг катта кунлик пасайиш бўлди. Акциялар, облигациялар ва доллар бир вақтнинг ўзида қулади.
АҚШ фонд бозорлари Доналд Трампнинг иккинчи президентлик муддатининг иккинчи йилини кескин пасайиш билан бошлади. 21 январ куни савдолар якунларига кўра, «S&P 500» индекси 2,1 фоизга тушди — бу сўнгги уч ойдаги энг катта кунлик пасайиш бўлди. Натижада, бозор капитализацияси 1,3 трлндан ортиққа қисқарди, деб ёзмоқда «Reuters».
Бу каби пасайишга АҚШ президенти Доналд Трампнинг савдо урушларини қайта бошлаш, шунингдек, Гренландия масаласи сабаб Европа билан иттифоқчиликни қайта кўриб чиқиш ҳақидаги баёнотлари туртки бўлди.
Ишонч заифлашмоқда
Бу сафар бозордаги саросима одатдагидан фарқ қилди: акциялар, АҚШ ғазначилик облигациялари (Treasuries) ва доллар бир вақтнинг ўзида қиймат йўқотди. Бу ҳолат инвесторлар орасида АҚШ активларига нисбатан ишонч заифлашаётганини кўрсатди.
Таҳлилчилар бозорда яна «Sell America» («Американи сот») стратегияси ҳақида гап-сўзлар пайдо бўлганини қайд этмоқда. Бу атама илк бор ўтган йил апрелида, «Liberation Day» деб аталган даврда, капитал АҚШ активларидан оммавий чиқиб кета бошлаган пайтда ишлатила бошлаган эди.
«Cresset Capital»нинг бош инвестиция стратеги Жек Эблин глобал инвесторлар таҳдидларни жиддий қабул қилаётганини таъкидлади.
«Озодлик кунидан сўнг кўпчилик тубни сотиб олишга ҳаракат қилади, деб ўйлаган эдим. Афтидан бу сафар бундай бўлмайди», — деди у.
Нозик ҳолатдаги бозор
Мутахассисларнинг фикрича, бозор айни пайтда жуда нозик ҳолатда. Акциялар сўнгги уч йил давомида икки хонали ўсишни кўрсатгани сабабли қиммат баҳоланмоқда ва ҳар қандай салбий янгилик кучли реакция чақиряпти.
«New York Life Investments» вакили Лорен Гудвин акциялар тушиб, облигациялар даромадлилиги ўсиб, доллар сотилаётган кунлар инвесторларни асосий тахминларини қайта кўриб чиқишга мажбур қилаётганини билдирди.
Шу билан бирга, барча таҳлилчилар ҳам ваҳимага берилмасликка чақирмоқда. «Angeles Investments» вакили Майкл Розен АҚШ бозорини тўлиқ тарк этишга ҳожат йўқлигини айтди. Унинг сўзларига кўра, 2026 йилда «S&P 500» таркибидаги компаниялар фойдаси 15,5 фоизга ўсиши кутилмоқда.
