Бишкекдан келган хорижликнинг «спорт озуқаси» ичидан наркотиклар топилди
Қолаверса, Сурхондарёда қиймати 180 минг долларга тенг бўлган опий партиясининг ноқонуний савдосига ҳам нуқта қўйилди.
Тошкент халқаро аэропортида Бишкекдан учиб келган қўшни давлат фуқаросининг жомадонида спорт озуқаси сифатида кўрсатилган гиёҳвандлик моддалари аниқланди. Бу ҳақда Божхона қўмитаси матбуот хизмати хабар берди.
Қайд этилишича, «Тошкент-Аэро» ихтисослаштирилган божхона комплекси тезкор тузилмалари пойтахт аэропортида Бишкекдан учиб келган қўшни давлат фуқароси божхонадан «яшил» йўлак орқали ҳаракатланиб, жомадонида синтетик гиёҳвандлик воситаларини олиб киришга уринганини аниқлаган.
«Гўёки спорт озуқаси тарзида олиб ўтилаётган 2 та қутидаги 684 дона капсула таркибида 560,75 грамм «алфа-ПВП» синтетик гиёҳвандлик моддаси мавжудлиги аниқланди. Шундан сўнг мазкур наркожиноятнинг илдизига етиб бориш мақсадида комплекснинг Контрабандага қарши курашиш шўъбаси томонидан давлат хавфсизлик хизмати ва ички ишлар идоралари вакилларини жалб қилган ҳолда Тошкент шаҳрида тезкор тадбир ўтказилди», - дейилади хабарда.
Қўмитага кўра, хориждан олиб кирилган 560,75 грамм «алфа-ПВП» синтетик гиёҳвандлик моддасини қабул қилиб олиши керак бўлган шахс ҳам Бектемир туманида қўлга олинган.
Ушбу шахснинг хонадони белгиланган тартибда кўздан кечирилганида, бу ерда 114 дона капсулада тахминан 80 грамм оғирликдаги «АЛФА-ПВП» синтетик гиёҳвандлик моддаси ва уларни тарқатиш учун ҳозирланган 37 дона ўрамчалар, 2 грамм оғирликдаги марихуана, 2 дона ўрамда 30 грамм оғирликда бошқа турдаги синтетик наркотик модда, 4 дона электрон тарози, изоленталар ва зип пакетлар мавжудлиги аниқланиб, далилий ашё тариқасида олинган.
Шунингдек, «Тошкент-Аэро» ИБК Контрабандага қарши курашиш шўъбаси томонидан Сурхондарё вилояти божхона бошқармаси ва Давлат хавфсизлик хизмати билан ҳамкорликда ўтказилган тезкор тадбирда аввалдан кузатувга олинган шахс ёнидаги 14 дона ўрамга жойланган 14 кг 680 грамм оғирликдаги «опий» гиёҳвандлик воситасини 180 минг долларга сотаётган вақтида қўлга олинган.
Ҳозирда ҳар иккала ҳолат юзасидан божхона органлари томонидан жиноят ишлари қўзғатилган.
Эслатиб ўтамиз, божхоначилар йил бошидан буён аниқланган 171 та ҳолатда 383 килограммдан зиёд гиёҳвандилк воситаларининг божхона чегаралари орқали олиб ўтилиши ва ички ҳудуддаги яширин айланмасига чек қўйишган.
