Биткоин 56 минг долларгача тушиши мумкин: бу ёмон сценарийда
CryptoQuant таҳлилчилари криптобозорда «айиқ цикли» бошланганини айтиб, биткоин нархи яқин ойларда кескин пасайиши мумкинлигини огоҳлантирмоқда.
Криптовалюта бозорида салбий тренд кучайиб бормоқда. CryptoQuant таҳлил платформаси талабнинг кескин пасайиши фонида биткоин учун «айиқ цикли» (максимумлардан 20 фоиздан ортиқроқ нарх қулаш даври) бошланганини маълум қилди. Мутахассислар ҳисоб-китобларига кўра, яқин ойларда биткоин нархи 70 минг долларгача пасайиши, энг ёмон сценарийда эса 56 минг долларга тушиши мумкин.
Таҳлилчилар талабнинг пасайишини 2025 йил ноябр ойидан бошлаб қайд этмоқда. Илгари биткоин нархини юқорида ушлаб турган асосий омиллар ўз таъсирини йўқотган. АҚШда спот биткоин ETFларининг жорий этилиши, сайлов кампаниялари ва йирик компанияларнинг криптоактивларга қизиқиши нарх ўсишининг асосий драйверлари бўлган эди. Аммо октябрдан бошлаб бозордаги талаб ўртача кўрсаткичлардан пастга тушган.
Институционал инвесторлар ҳам нархга салбий таъсир кўрсатмоқда. 2025 йилнинг тўртинчи чорагида америкалик ETFлар тахминан 24 минг биткоинни сотган. Бу эса уларнинг стратегияси фаол хариддан актив сотувга ўтганини англатади ва бозордаги босимни кучайтирган.
CryptoQuant таҳлилчилари биткоин учун икки асосий пасайиш даражасини ажратиб кўрсатмоқда. Биринчи даража — 70 минг доллар бўлиб, унга 3–6 ой ичида етиб бориш эҳтимоли бор. Иккинчи, узоқ муддатли минимал кўрсаткич эса 56 минг доллар деб баҳоланмоқда. Бу рақам айланмадаги барча биткоинларнинг ўртача харид нархига тўғри келади ва тарихан айнан шу нуқтада медвежий цикллар якунланган.
Шу билан бирга, мутахассислар бу сценарий амалга ошса ҳам, пасайиш нисбатан юмшоқ бўлишини таъкидламоқда. Ҳисоб-китобларга кўра, эҳтимолий пасайиш энг юқори қийматдан тахминан 55 фоизни ташкил этади, бу биткоин тарихидаги энг енгил цикллардан бири бўлиши мумкин.
Техник индикаторлар ҳам салбий сигналлар бермоқда. Фючерс бозорида молиялаштириш ставкалари 2023 йил декабридан бери энг паст даражага тушган. Бу трейдерларнинг ўсишга ишончи камайганини кўрсатади. Шунингдек, биткоин нархи 365 кунлик ҳаракатланувчи ўртача кўрсаткичдан пастга тушиб кетган, бу эса бозор фазасининг ўзгаришини англатади.
Шу билан бирга, йирик молия институтлари ҳали ҳам оптимистик прогнозларни сақлаб қолмоқда. Айрим банклар келаси йилларда биткоин нархи янги рекордларга чиқиши мумкинлигини истисно этмаяпти. Бироқ CryptoQuant баҳолашларига кўра, қисқа ва ўрта муддатда бозор учун асосий хавф пасайиш сценарийси бўлиб қолмоқда.
