BMT Xavfsizlik Kengashi Eron bo‘yicha favqulodda yig‘ilish o‘tkazdi

Buyuk Britaniyaning BMTdagi elchisi Barbara Vudvord mamlakatning bu zarbalarida ishtirok etmaganini ma’lum qildi. Uning ta’kidlashicha, Britaniya uchun asosiy ustuvorlik — vaziyatni keskinlashtirmasdan, deeskalatsiyani qo‘llab-quvvatlash hisoblanadi. Vudvord Eronning yadroviy dasturi xalqaro xavfsizlik uchun jiddiy tahdid ekanini ta’kidlab, harbiy yechimlar bilan muammoni bartaraf etib bo‘lmasligini bildirdi. U barcha tomonlarni muzokaralar stoliga qaytishga chaqirdi. Yig‘ilishda Atom energiyasi bo‘yicha xalqaro agentlik rahbari Rafael Grossi ham so‘zga chiqdi. U hali diplomatik yechim uchun imkoniyatlar mavjudligini aytib, bu “imkoniyatlar oynasi”ni yopmaslik zarurligini ta’kidladi. Aks holda, u zo‘ravonlik avj olishi va yadroviy qurollarni tarqatmaslik tizimi qulashi mumkinligi haqida ogohlantirdi. AQSH prezidenti Donald Tramp esa “Truth Social”dagi chiqishida Erondagi yadroviy inshootlarga kuchli zarbalar berilganini ma’lum qildi. Uning aytishicha, B-2 bombardimonchi samolyotlari Missuri shtatidagi bazasiga qaytgan. Ma’lumot uchun, 22 iyun kuni AQSH Eronning bir qator ob’ektlariga havo zarbalari bergan edi.