BYD 2000 km masofa bosa oladigan arzon gibrid sedan taqdim etdi

Xitoyning BYD kompaniyasi o‘zining yangi gibrid sedani — Seal 05 DM-i 2026 yilgi modelini taqdim etdi. Bu haqda CarNewsChina xabar berdi. Yangi model avvalgi variantga o‘xshash ko‘rinishda bo‘lsa-da, salonda va texnik jihatda jiddiy yangilanishlarga ega bo‘ldi. Seal 05 DM-i’ning asosiy o‘lchamlari quyidagicha:

• uzunligi — 4780 mm;
• eni — 1837 mm;
• balandligi — 1515 mm,
• g‘ildirak bazasi — 2718 mm.

Salon qismida uch ayrili, past qismi tekis rul, 8,8 dyuymli raqamli panel va 10,1 dyuymli markaziy displey o‘rnatilgan. Asosiy yangilik — uzatmalar richagi endi rul kolonkasiga ko‘chirilgan, bu esa ichki bo‘shliqni kengaytirishga imkon bergan. Avtomobil old o‘rindilari qo‘l bilan sozlanadigan qilib yangilandi, audiotizim olti dinamik bilan jihozlangan. Mashinani smartfon orqali masofadan boshqarish mumkin. Shuningdek, olti xavfsizlik yostiqchasi va kruiz nazorat tizimi mavjud. Bagaj hajmi — 508 litr. Gibrid tizimida 1,5 litrli 99 ot kuchiga ega benzin dvigateli va 161 ot kuchli elektromotor ishlaydi. U 0 dan 100 km/hʼ gacha 7,9 soniyada tezlashadi. Avtomobil 15,87 kWh lik akkumulyator bilan jihozlangan bo‘lib, faqat elektrda 128 km masofa bosib o‘ta oladi. Benzin va to‘liq zaryad bilan Seal 05 DM-i bir yo‘lda 2000 km masofani bosib o‘tadi. O‘rtacha yonilg‘i sarfi har 100 kmʼga 3,08 litr. Narxi ham arzonligi bilan ajralib turadi: yangi BYD Seal 05 DM-i Xitoy bozorida 11 ming dollar atrofida sotuvga chiqadi. Model byudjetli gibridlar segmentida eng uzoq yurish masofasiga ega avtomobillardan biri bo‘ldi.