Cashgenics Hindistonda 3,5 mln dollarlik eksport shartnomalari tuzdi
10.06.2025 | 13:1034122
O‘zbekistondagi Cashgenics kompaniyasi Hindistonda o‘tkazilgan biznes uchrashuvlarda 3,5 mln dollarlik mahsulot yetkazib berish bo‘yicha eksport shartnomalariga erishdi. Bu kelishuvlar kompaniyaning xalqaro bozordagi pozitsiyasini mustahkamlaydi.
«O’zeltexsanoat» uyushmasi a’zosi bo‘lgan Cashgenics kompaniyasi Hindistondagi xalqaro biznes tadbirlari doirasida o‘z eksport salohiyatini kengaytirdi. Kompaniya Nyu-Dehlida tashkil etilgan Hindiston–Markaziy Osiyo biznes kengashi uchrashuvlarida ishtirok etib, qator B2B muzokaralar olib bordi.
Muzokaralar natijasida Cashgenics Hindistonning yetakchi kompaniyalari — Wald Wide International, BharatiyaZPM, Wimman, Cosmic Care, Big Hearts, Velogic, Shymal Khmathan va Art International bilan umumiy qiymati 3,5 mln dollar bo‘lgan eksport shartnomalarini imzoladi.
Kompaniya Hindistonga turli mahsulotlar yetkazib berish orqali hamkorlikni yo‘lga qo‘yadi. Shu bilan birga, Cashgenics ishlab chiqarish hajmini oshirish, yangi texnologiyalarni joriy etish va xalqaro sheriklikni kengaytirishni maqsad qilgan.
Ushbu kelishuvlar nafaqat kompaniyaning tashqi bozordagi mavqeini kuchaytiradi, balki O‘zbekistonning umumiy eksport salohiyati o‘sishiga ham hissa qo‘shadi. Cashgenics’ning bu yutug‘i mamlakat sanoatidagi zamonaviy yondashuv va xalqaro hamkorlikni rivojlantirishga xizmat qiladi.
