Davlat byudjeti: daromad va xarajatlar o‘rtasidagi katta tafovut

Moliya vazirligi tomonidan e’lon qilingan ma’lumotlarga ko‘ra, 2025 yilning may oyi ko‘rsatgichlari bo‘yicha O‘zbekiston Respublikasi davlat byudjeti bo‘yicha daromadlar va tushumlar 9 trln 930,1 milliard so‘mni tashkil etdi. Shu bilan birga, ko‘rsatilgan davrda umumiy davlat byudjeti xarajatlari 19 trln 984,1 mlrd so‘mga yetdi. Bu esa daromad va xarajatlar o‘rtasida deyarli 10 trln so‘mlik farq borligini ko‘rsatadi. Mazkur xarajatlar tarkibida davlat maqsadli jamg‘armalariga o‘tkazilgan transferlar ham inobatga olingan. Bu holat byudjet xarajatlarining asosiy qismini tashkil etayotganini anglatadi. Moliya vazirligiga ko‘ra, xarajatlar hajmining yuqoriligi joriy ijtimoiy va iqtisodiy dasturlarni amalga oshirish, byudjet tashkilotlarining xarajatlarini moliyalashtirish, shuningdek, aholiga qaratilgan ijtimoiy yordam va ijtimoiy xizmatlar bilan bog‘liq xarajatlar hisobiga shakllangan. Daromad qismi esa asosan soliqlar, bojxona to‘lovlari va boshqa majburiy to‘lovlar hisobidan shakllangan. Shunday bo‘lsa-da, xarajatlar hajmining daromaddan ancha yuqori ekanligi davlat byudjetidagi taqchillik muammosi davom etayotganini ko‘rsatadi.