Donald Tramp TikTok’ni sotib olishga tayyor «juda boy odamlar guruhi»ni topdi
30.06.2025 | 08:3032363
AQSH prezidenti Donald Tramp TikTok’ni sotib olishga tayyor «juda boy odamlar guruhi» topilganini ma’lum qildi. Uning so‘zlariga ko‘ra, kelishuvni amalga oshirish uchun Xitoy rahbari Si Jinpingning roziligi talab etiladi.
Tramp bu haqda Fox News telekanalidagi «Sunday Morning Futures» dasturida gapirib o‘tdi. U aytishiga ko‘ra, Xitoy tomonining bu jarayonga rozi bo‘lishi katta ehtimol bilan amalga oshadi. «Menimcha, rais Si ham buni ma’qullaydi», — dedi Tramp.
Shu bilan birga, AQSH rahbari xaridorlarning aniq nomlarini ochiqlamadi. U ular haqida odatiy tarzda ikki haftadan so‘ng ma’lumot berishini va’da qildi. «Bu haqda taxminan ikki haftadan keyin aytaman», — dedi Tramp.
Eslatib o‘tamiz, 2024 yil bahorida AQSH Kongressi palatasi TikTok’ning amerikalik foydalanuvchilar ma’lumotlarini Xitoy hukumatiga uzatishi xavfi borligi sababli uning faoliyatini taqiqlash yoki ByteDance kompaniyasi tarkibidan ajratib chiqarish haqida qonun qabul qilgan edi. Ijtimoiy tarmoqning AQSHdagi bo‘limlarini sotish uchun yakuniy muddat ilk bor 19 yanvarga belgilangan edi. Tramp prezidentlikka qaytgach, bu muddatni avval 5 aprelgacha, so‘ng yana 75 kunga uzaytirdi.
Tramp bu borada o‘zining taktik yondashuvini bildirib, «TikTok to‘liq yo‘qolib ketmasligi kerak. Biz Xitoy va TikTok bilan kelishuvni amalga oshirishga intilayapmiz», — deb ta’kidladi.
