Доналд Трамп: «Яқин орада Венесуэлага қуруқлик операцияси бошланади»

АҚШ президенти Доналд Трамп жонли эфирда дунёдаги сиёсий вазиятни кескинлаштирган баёнот билан чиқди. У Венесуэла ҳукумати ва унинг раҳбари Николас Мадурони наркотик савдосини қўллаб-қувватлаётганликда айблади ва «яқин кунларда Венесуэлага қуруқлик операцияси бошланади», деб маълум қилди.

Трампнинг сўзларига кўра, Венесуэладаги вазият АҚШ миллий хавфсизлиги учун жиддий таҳдид туғдираётгани сабабли, Вашингтон ҳарбий чораларни кўришга мажбур. У журналистлар саволига жавоб бериб, «бу қарорни кечиктириш имконсиз», деб таъкидлади.

Шу билан бирга, Венесуэла президенти Николас Мадуро АҚШ таҳдидига жавобан Россияда ишлаб чиқарилган «Igla-S» турдаги 5 мингдан зиёд ҳаво мудофаа ракеталарини мамлакатнинг стратегик ҳудудларига жойлаштирганини маълум қилди. Унинг таъкидлашича, бу қуроллар мамлакатнинг энг чекка минтақаларига ҳам тарқатилган ва ҳар қандай ҳужумни қайтаришга тайёр ҳолатда турибди.

Мадуро АҚШни Кариб денгизи орқали ҳарбий кучларини кучайтиргани учун танқид қилди. CNN маълумотига кўра, АҚШ август ойида Венесуэла яқинига сувости кемалари ва ҳарбий кемалардан иборат денгиз гуруҳини жўнатган. Шу билан бирга, АҚШ мудофаа вазири Пит Ҳэгсетт Венесуэлада «режим ўзгариши»ни ҳам назарда тутувчи ҳарбий операцияга тайёргарлик кўрилаётганини тасдиқлаган.

Мадуро жавобан мамлакатда 4,5 миллионлик халқ милициясини сафарбар этганини ва ҳар қандай ҳужумни қайтаришга тайёр эканини маълум қилган. Шу орада АҚШ денгиз кучлари Венесуэла ҳудуди яқинидаги бир неча кемаларни «наркотик контрабандаси» баҳонаси билан йўқ қилгани халқаро ҳамжамият томонидан қораланган ва «халқаро ҳуқуқни бузиш», деб баҳоланган.