Dunyoning eng keksa prezidenti sakkizinchi muddatga qayta saylandi

Kamerunda bo‘lib o‘tgan prezidentlik saylovlarida 92 yoshli Pol Biyya sakkizinchi marta prezident etib qayta saylandi. Bu haqda BBC xabar berdi.

Pol Biyya saylovlarda 53,66 foiz ovoz to‘plab, sakkizinchi muddatga saylandi. U yana yetti yil davomida Kamerunni boshqarishni davom ettiradi.

Pol Biyya 1982 yildan buyon mamlakat prezidenti lavozimini egallab kelayotgan dunyodagi eng keksa amaldor rahbar hisoblanadi.

Kamerundagi saylovlar 12 oktyabr kuni o‘tkazilgan, ammo rasmiy natijalar 27 oktyabrda e’lon qilindi. Konstitutsiyaviy sudga natijalarni tasdiqlash uchun 15 kun vaqt berilgan edi. Markaziy saylov komissiyasi ovoz berish tinch muhitda o‘tganini ma’lum qildi.

Ma’lumotlarga ko‘ra, Biyya saylovoldi kampaniyasi davomida faqat bir marta miting o‘tkazgan, qolgan vaqtning katta qismini shaxsiy tashrif bilan Yevropada o‘tkazgan. Saylovda jami o‘n nafar nomzod ishtirok etdi, ularning ikkitasi Biyya tarafdorlari bo‘lib, ishtirok etish uchun vazirlik lavozimlarini tark etgan.

Asosiy raqib sifatida ko‘rilgan 71 yoshli muxolifat yetakchisi Moris Kamto esa iyul oyida saylovda ishtirok etishdan chetlatilgan. Konstitutsiyaviy sud bu qarorni qo‘llab-quvvatlagan, ammo jamiyatda bu holat «siyosiy raqibni maydondan chiqarish uchun qo‘llangan chora» sifatida baholangan.

Muxolifatning boshqa nomzodi, sobiq vazir Isse Chiroma Bakari saylov natijalari e’lon qilinishidan oldin o‘zini g‘olib deb e’lon qilgan edi. Biroq rasmiy ma’lumotlarga ko‘ra, u 35,2 foiz ovoz to‘plagan. Chiroma va uning tarafdorlari hukumatni saylov natijalarini soxtalashtirishda ayblamoqda.

Pol Biyya Kamerundagi uzoq muddatli hukmronligi bilan Afrikadagi eng tajribali va bahsli siyosiy shaxslardan biri sifatida baholanadi. Uning navbatdagi g‘alabasi mamlakatdagi siyosiy barqarorlik va demokratiya darajasi haqida yangi bahslarni keltirib chiqardi.