«Энг ҳимояланган сектор»: Урушдан бемалол чиқа оладиган акциялар қайси соҳадалиги айтилди

Яқин Шарқдаги можаро кучайиб бораётган бир пайтда фармацевтика компаниялари акциялари ҳимоя активларидан бирига айланиши мумкин, деб ҳисоблайди UBS таҳлилчилари. Бу ҳақда банкнинг таҳлилий ёзувига таяниб, CNBC телеканали хабар берди.

Телеканал таъкидлашича, АҚШ ва Эрон ўртасидаги урушнинг биринчи ҳафтасида айрим анъанавий «хавфсиз бошпана» активлари кутилгандек ўзини тутмаган: олтин нархи 1,5 фоиздан ортиқ арзонлашди, асосий истеъмол товарлари сектори эса нефт ва бензин нархлари ошиши туфайли босим остида қолди. Шу фондан келиб чиқиб, UBS таҳлилчилари портфелни ҳимоя қилишнинг бошқа усулини таклиф қилмоқда. Уларнинг фикрича, фармацевтика компаниялари акциялари Эрон билан уруш шароитида нисбатан барқарор бўлиши мумкин.

«Яқин Шарқдаги таранглик фонида кўплаб инвесторлар диверсификация йўлларини изламоқда. Фармацевтика сектори энг ҳимояланган соҳалардан бири бўлиб, PMI индекслари билан жуда кучли тескари корреляцияга эга», – деб ёзади UBS стратеги Андрю Гартвейт.

Бу дегани, иқтисодиёт секинлашганда бу акциялар бозорга нисбатан яхшироқ натижа кўрсатиши мумкин.

Таҳлилчи тилга олган компаниялар орасида «Eli Lilly and Company» ва «Merck & Co.» ҳам бор. UBS бу икки акцияга ҳам «Buy» рейтинги берган, яъни уларни сотиб олишни тавсия қилмоқда. Шу билан бирга, Гартвейт бу баҳолаш 30 дан ортиқ фармацевтика компанияларига ҳам тааллуқли эканини қайд этди. Сўнгги олти ой ичида «Eli Lilly and Company» акциялари тахминан 36 фоизга, «Merck & Co.» акциялари эса 37 фоизга қимматлашган.

Қарз юки пастлиги

Гартвейтнинг таъкидлашича, фармацевтика компаниялари акциялари ҳали ҳам нисбатан арзон баҳоланмоқда. Бундан ташқари, компанияларнинг қарз юки пастлиги ҳам уларнинг афзалликларидан бири ҳисобланади. Унинг фикрича, кредит спредлари ошган пайтларда бу сектор энг яхши натижаларни кўрсатадиган соҳалардан бири.

Бу активлар фойдасига қўшимча омил сифатида шорт-позициялар улушининг юқорилигини ҳам келтириш мумкин: UBS маълумотларига кўра, бу кўрсаткич бўйича фармацевтика 29 та глобал соҳа орасида еттинчи ўринни эгаллайди. Бу эса шорт-сквиз – акциялар нархининг кескин ўсиши эҳтимолини оширади. Бундай ҳолатда акциялар пасайишини кутиб шорт-позиция очган инвесторлар уларни ёпиш учун бозордан акцияларни қайта сотиб олишга мажбур бўлади.

Бундан ташқари, UBS таҳлилчилари фикрича, генератив сунъий интеллект даврида ҳам бу сектор ютуққа эга бўлиши мумкин. Чунки бундай технологиялар фармацевтика соҳасида тадқиқот ва ишланмалар самарадорлигини ошириши мумкин.