Эрон миллий футбол жамоаси ЖЧ-2026 да иштирок этмайди
Эрон спорт вазири Аҳмад Дунёмоли мамлакат миллий терма жамоаси АҚШ, Канада ва Мексика мезбонлик қиладиган 2026 йилги Жаҳон чемпионатида қатнашмаслигини расман эълон қилди.
Бундан аввал Эрон футбол федерацияси раҳбари Меҳди Тож Исроилнинг АҚШ қўллови билан бошлаган ҳарбий амалиётидан сўнг терма жамоанинг турнирдаги иштироки сўроқ остида эканини билдирган эди. Спорт вазири Дунёмолининг таъкидлашича, сиёсий вазият туфайли Эрон учун мусобақада қатнашиш имконияти қолмаган.
«Коррупциялашган ҳукумат раҳнамомизни ўлдирганидан сўнг, биз учун Жаҳон чемпионатида иштирок этишга имкон берувчи ҳеч қандай шароит йўқ», — дея вазирнинг сўзларини келтиради TV2.
ФИФА ва Трампнинг муносабати
Қизиқарли жиҳати, Эроннинг ушбу баёнотидан бир оз аввал ФИФА президенти Жанни Инфантино АҚШ президенти Доналд Трамп Эрон терма жамоасини ўз мамлакатида кўришдан хурсанд бўлишини айтган эди. Бироқ Теҳроннинг кескин позицияси халқаро спорт ҳамжамиятининг умидларини чиппага чиқарди.
Эроннинг гуруҳдаги рақиблари
Қуръа натижаларига кўра, Эрон терма жамоаси «C» гуруҳидан жой олган бўлиб, у ерда Янги Зеландия, Белгия ва Миср билан куч синашиши керак эди. Режага мувофиқ, Эрон иштирокидаги барча ўйинлар АҚШ ҳудудида ўтказилиши белгиланганди.
Эроннинг мусобақадан воз кечиши ФИФА учун техник ва ташкилий муаммоларни келтириб чиқаради. Эндиликда ташкилот Эрон ўрнини қайси жамоа эгаллаши ёки гуруҳдаги ўйинлар тартиби қандай бўлиши бўйича тезкор қарор қабул қилиши лозим.
2026 йил 11 март ҳолатига кўра, бу қарор Жаҳон чемпионати тарихидаги энг йирик сиёсий бойкотлардан бири сифатида қайд этилди.
