Эрон олий раҳнамоси ҳушсиз ва бирор-бир қарор қабул қилишда иштирок этишга қодир эмас — «The Times»

Эроннинг янги олий раҳнамоси Мўжтабо Хоманаий ҳушсиз ҳолатда, у Эроннинг Қум шаҳрида даволанмоқда. Бу ҳақда «The Times» нашри Америка ва Исроил разведка хизматлари маълумотларига таяниб, ёзмоқда.

«Мўжтабо Хоманаий Қумда оғир аҳволда даволанмоқда, у режим томонидан бирор-бир қарор қабул қилинишида иштирок этишга қодир эмас», — дейилади журналистлар танишиб чиққан ва АҚШнинг Форс кўрфазидаги иттифоқчиларига юборилган дипломатик қайдда.

Али Хоманаийнинг дафн маросими

Қум шаҳри мамлакат марказида, Теҳрондан тахминан 140 километр жанубда жойлашган. У муқаддас шаҳар ҳисобланади — 28 феврал куни ўлдирилган Мўжтабо Хоманаийнинг отаси ва Эроннинг аввалги олий раҳнамоси Али Хоманаий ҳам айнан ўша ерда дафн этиш режалаштирилган.

«Унинг жасади дафн маросимига тайёрланмоқда», - деб ёзди «The Times».

Эрон ҳукумати Али Хоманаийнинг дафн маросимини «мисли кўрилмаган даражадаги одам келиши кутилаётгани» сабаб кечиктирди, бироқ бу кечикиш вафот этганларни ўлимидан сўнг дарҳол дафн қилиш бўйича шиалик анъаналарини инобатга олганда «саволлар уйғотди», деб таъкидлайди нашр. 8-апрел куни Хоманаий вафотига 40 кун тўлади — бу шиалик исломида анъанавий мотам даврининг тугашини англатади.

Шубҳалар

Мўжтабо Хоманаий 28 феврал куни АҚШ ва Исроилнинг Эронга қилган ҳужумларининг илк кунидаёқ яраланган эди, унинг отаси Али Хоманаий эса ўшанда ўлдирилган. 7-март куни Исроилнинг 12-канали манбаларга таяниб, кичик Хоманаийнинг яралангани ҳақида хабар берди. Кейинроқ «The New York Times» Мўжтабо Хоманаий оёқларидан жароҳат олгани ҳақида ёзди. Орадан яна бир неча кун ўтиб, Эрон ТИВ ҳамда Эроннинг Тошкентдаги элчиси Мўжтабо Хоманаий яраланганини, аммо «ўзини яхши ҳис қилаётганини» тасдиқлади. Янги олий раҳнамо этиб сайланганидан бери Мўжтабо Хоманаий бирор марта жамоатчилик олдида кўриниш бермаган.