Eski «Toshturma» hududi sanoat kompaniyasiga berilgani oshkor bo‘ldi. U yer xiyobon bo‘lishi kerak edi

Ayblanuvchilarni saqlash bo‘yicha 1-sonli sobiq hibsxona («Toshturma») hududi kompensatsiya sifatida sanoat korxonasiga doimiy foydalanishga berilgan. Bu haqda Toshkent shahar hokimligining senator so‘roviga bergan javobida aytilgan, deya yozmoqda Onews.

Qayd etilishicha, 2017 yilda Yunusobod tumanida joylashgan mazkur hibsxona Zangiota tumaniga ko‘chirilgan. Hukumatning 2018 yil 22-martdagi farmoyishiga asosan, sobiq hibsxona bino va inshootlari atrofidagi hudud bilan birgalikda shahar hokimligiga bepul operativ boshqaruvga o‘tkazilgan.

Ushbu farmoyish asosida ushbu hududda zarur infratuzilmaga ega zamonaviy bulvar (dam olish zonasi) qurilishi rejalashtirilgan edi, biroq bu topshiriq yetti yildan beri bajarilmay kelmoqda.

Onews'ga ko‘ra, keyinchalik, Yunusobod Business City turar-joy va savdo kompleksini amalga oshirish (hududda High Town turar-joy majmuasi va Toshkentdagi ikkinchi yirik siti-moll bo‘lishni va’da qilayotgan 65 ming kv. m maydonga ega savdo markazi qurilgan) va Prezident topshiriqlarini bajarish maqsadida, Toshkent shahar hokimining 2020 yil 7-oktabrdagi 888-sonli qarori bilan ushbu yer uchastkasi Ogneupor MCHJga kompensatsiya sifatida ajratilgan.

Kompaniya avvalroq Chinobod ko‘chasidagi 3 gektar yerni egallab turgan, u yerda uning biznes markazi qurilishi uchun olib qo‘yilgan ishlab chiqarish binolari (2571 kv. m) joylashgan edi. Namangan ko‘chasidagi 2,9 gektar maydonga ega yangi hudud (sobiq tergov izolyatori o‘rnida) korxonaga ma’muriy bino qurish uchun doimiy foydalanish huquqi bilan berilgan.

Hokimlik ma’lumotlariga ko‘ra, tasdiqlangan loyiha va 2024 yil 6-apreldagi qurilish ruxsatnomasi asosida, ushbu uchastkada 76 kv. m maydonga ega ma’muriy bino qurilgan. obyekt foydalanishga qabul qilingan va 2024 yil 9-aprelda davlat kadastrida ro‘yxatdan o‘tkazilgan.

Javobda, shuningdek, Hukumatning 2024 yil 24-dekabrdagi, Toshkentning 2045 yilgacha bo‘lgan bosh rejasini tasdiqlagan qaroriga muvofiq, ushbu uchastka qo‘riqlanadigan (konservatsiya) zonasiga kiritilgani va u yerda qo‘shimcha turar-joy va noturar-joy binolari qurish taqiqlangani aniqlashtirilgan.

Masalani joyida o‘rgangan ishchi guruhning xabar berishicha, Ogneupor vakillari dastlab yangi uchastkada olovbardosh materiallar ishlab chiqarishni qayta tiklashni niyat qilishgan, ammo turar-joy mavzeida joylashgani sababli bu imkonsiz bo‘lib chiqqan. Kompaniya mehmonxona qurish imkoniyatini ko‘rib chiqqan, ammo yetarli mablag‘ga ega emasligini bildirgan.

Bundan tashqari, Ogneupor bir necha marta «yagona darcha» tizimi orqali uchastkani xususiylashtirish uchun ariza topshirgan — birinchi marta 2022 yilda, keyin esa 2025 yilda. Biroq arizalar rad etilgan, chunki uchastka qo‘riqlanadigan zonaga kiritilgan. Kompaniyaning ma’lum qilishicha, agar ushbu hudud cheklov zonasidan chiqarilsa, ular mehmonxona yoki maishiy xizmat ko‘rsatish do‘konlari bo‘lgan ko‘p qavatli uy qurish uchun investor jalb qilishni rejalashtirmoqda.

Hokimlik uchastkaning ajratilishi va qurilgan ma’muriy binoning ro‘yxatdan o‘tkazilishi amaldagi qonunchilikka muvofiq amalga oshirilganini ta’kidladi.

Poytaxtning Yunusobod tumanida joylashgan, 1891 yilda qurilgan tosh «Toshturma» kompleksi 4 ta yerto‘lali korpusdan iborat bo‘lib, ular yer osti va yer usti yo‘laklari bilan bog‘langan edi. 2018 yil boshida barcha mahbuslar Toshkent viloyatining Zangiota tumanidagi yangi muassasaga ko‘chirilgan.

Ogneupor kompaniyasi 1998 yilda Toshkentda ro‘yxatdan o‘tgan. Ustav kapitali 28,5 mlrd so‘mni tashkil etadi. Ta’sischisi sifatida Choshtepa Garden qurilish kompaniyasiga ham egalik qiluvchi Aleksandr Leonidovich Mun ko‘rsatilgan.