FIFA 2026 йилги жаҳон чемпионати учун 60 долларлик чипталар чиқаради
Футбол мухлисларининг кескин танқидларидан сўнг Жаҳон чемпионати учун чекланган миқдордаги арзон чипталар сотувга чиқарилади.
Халқаро футбол федерацияси (FIFA) жамоатчилик танқидларидан сўнг 2026 йилги жаҳон чемпионати чипталари нархини пасайтирди. Эндиликда айрим мухлислар чипталарни $60 эвазига харид қилишлари мумкин бўлади, бироқ миллий федерациялар бу чипталарни энг содиқ мухлислар ўртасида қандай тақсимлашни ўзлари ҳал қилишади.
ESPN хабарига кўра, 2026 йилги жаҳон чемпионатининг ҳар бир ўйини учун $60 лик чипталар ажратилади. Бундай чипталар турнирда иштирок этувчи жамоаларнинг миллий федерацияларига топширилади. Федерациялар эса бу чипталарни энг ашаддий мухлисларга қандай тарқатиш бўйича мустақил қарор қабул қилади.
ОАВнинг қайд этишича, ҳар бир ўйин учун $60 лик чипталар сони минглаб эмас, балки юзлаб бўлиши кутилмоқда. FIFA нарх стратегиясини нега бунчалик кескин ўзгартирганига аниқлик киритмади, бироқ нархларнинг туширилиши «турнир давомида ўз миллий жамоалари билан бирга саёҳат қилаётган мухлисларни янада кўпроқ қўллаб-қувватлашга қаратилганини» маълум қилди.
Норозиликлар ва танқидлар
Аввалроқ Европа футбол мухлислари ассоциацияси (FSE) ЖЧ-2026 чипталари нархини «талончилик» деб атаган ва уларнинг сотувини зудлик билан тўхтатишга чақирган эди. Маълум қилинишича, агар мухлис финалгача бўлган барча ўйинларга чипта сотиб олса, бу унга $7000 дан кўпроққа тушиши мумкин эди.
FIFA арзон тоифадаги чипталарни жорий этиш ҳақида қарор қабул қилганидан кейин ҳам, Football Supporters Europe мухлислар ташкилоти бу ўзгаришларни «ярашиш учун етарли эмас» деб баҳолади. Шунингдек, улар имконияти чекланган мухлислар ва уларга ҳамроҳлик қилувчи шахслар учун аниқ нарх тузилмаси йўқлигига эътибор қаратишди.
«Ҳозирча биз FIFA'нинг бу баёнотини бутун дунёдаги салбий реакциядан сўнг мухлисларни тинчлантириш тактикаси сифатида баҳолаймиз», — дейилади ташкилот баёнотида.
Буюк Британия Бош вазири Кир Стармер ҳам FIFA'ни янада кенгроқ қадамлар ташлашга чақирди. У ўз ижтимоий тармоқларида: «Мен FIFA'нинг чипталар нархини пасайтириш ҳақидаги қарорини олқишлайман. Аммо Англия терма жамоаси ўйинлари учун пул жамғарган инсон сифатида, жаҳон чемпионати бу ўйинни ўзгача қиладиган ҳақиқий мухлислар билан алоқасини йўқотмаслиги учун FIFA'ни нархларни янада қулайроқ қилишга чақираман», - деб ёзди у.
Бундан етти йил аввал, Америка футбол мутасаддилари турнирни ўтказиш учун ариза топширишганда, уларнинг мақсади илк ўйинлар учун 21 долларлик юз минглаб чипталарни таклиф қилиш бўлган эди. Таққослаш учун, АҚШ охирги марта 1994 йилда жаҳон чемпионатига мезбонлик қилганда чипта нархлари 25 доллардан 475 долларгача бўлган. 2022 йилда Қатарда эса нархлар 70 доллардан 1600 долларгачани ташкил этган.
2026 йилги жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Турнирда рекорд даражадаги 48 та жамоа иштирок этади ва жами 104 та ўйин ўтказилади. Илк ўйин 11 июн куни Мехикодаги «Ацтека» стадионида бўлиб ўтса, финал учрашуви 19 июлга АҚШнинг Ню-Жерси штатидаги «Metlayf Stadium»да режалаштирилган. Бронза медали учун баҳс эса Майамида ўтказилади.
