Firibgarlikda ayblangan shaxs Polshadan O‘zbekistonga qaytarildi

Ekstraditsiya jarayoni O‘zbekistonning Polshadagi elchixonasi hamda ushbu davlatning tegishli huquqni muhofaza qiluvchi organlari bilan hamkorlikda amalga oshirildi. Ma’lumotlarga ko‘ra, A.A. Interpolning «qizil sirkulyari» orqali qidiruvga berilgan va u O‘zbekistonda firibgarlik jinoyatini sodir etganlikda ayblangan. Ushbu jinoyat unga nisbatan jinoyat ishi qo‘zg‘atilishiga va xalqaro qidiruv e’lon qilinishiga sabab bo‘lgan. O‘zbekiston elchixonasi ma’lumotida ta’kidlanishicha, jinoyat sodir etgan har qanday shaxs qonun oldida javob beradi. Shu munosabat bilan, elchixona barcha fuqarolarni qayerda bo‘lishidan qat’i nazar, qonunlarga rioya etishga chaqirdi. Ekstraditsiya qilingan shaxsga nisbatan qonun doirasida tegishli tergov harakatlari olib borilishi kutilmoqda.