Fitch Ўзбекистон кредит рейтингини «барқарор»дан «ижобий»га оширди

Fitch халқаро рейтинг агентлиги Ўзбекистон суверен кредит рейтингини «BB» даражасида тасдиқлаб, рейтинг кутилмасини «барқарор»дан «ижобий»га оширди. Бу ҳақда агентликнинг 3-июнь куни чоп этилган ҳисоботидан маълум бўлди.

2025-йилда Fitch томонидан Ўзбекистон кредит рейтинги «BB-»дан 1 поғона юқорига «BB» даражасига оширилган эди. Иқтисодиёт ва молия вазирлигига кўра, 2014-йилдан буён фақатгина 15 та мамлакат 12 ой ичида рейтинг баҳоси ва кутилмасини кетма-кет оширишга эришган.

Ҳисоботда Ўзбекистон кредит рейтинг кутилмасининг «ижобий»га оширилиши бир нечта сабаблар билан изоҳланган.

Биринчидан, глобал ноаниқликларга қарамай, ислоҳотлар натижадорлиги ва макроиқтисодий барқарорликни мустаҳкамлашга йўналтирилган сиёсатнинг давом эттирилиши орқали ўрта муддатда барқарор иқтисодий ўсиш ва макроиқтисодий кўрсаткичларнинг яхшиланиши кутилмоқда.

Иккинчидан, фискал ва монетар ислоҳотларнинг давом эттирилиши макроиқтисодий сиёсат ва шаффофликни мустаҳкамлаш орқали бюджет тақчиллигини пасайтириш ҳамда халқаро захираларнинг сезиларли ошишига хизмат қилади.

Шунингдек, амалга оширилаётган ислоҳотлар бошқарув сифати кўрсаткичларига ҳам ижобий таъсир кўрсатиши кутилмоқда.

«BB» рейтинги Ўзбекистоннинг давлат қарзининг ЯИМга нисбатан пастлиги, катта ташқи буферлар ва юқори ўсиш салоҳиятини акс эттиришда давом этмоқда.

Шунга қарамай, аҳоли жон бошига тўғри келадиган ЯИМнинг нисбатан пастлиги, юқори хомашёга боғлиқлик ва юқори инфляция мамлакат кредит рейтингига салбий таъсир қилаётгани айтилган.

Ўзбекистоннинг кредит рейтинги яхшиланишига Президент администрацияси раҳбари Саида Мирзиёева ҳам ўз муносабатини билдириб ўтди.

«Бу халқаро инвесторлар томонидан мамлакатимизга билдирилган юксак ишонч белгисидир. Мамлакатимизнинг суверен кредит рейтингини ошириш бўйича ишчи гуруҳ раҳбари сифатида алоҳида таъкидламоқчиманки, биз ҳамкорларимиз билан фаол алоқаларни давом эттирамиз. Стратегик мақсадимиз — 2030-йилга қадар юртимиз рейтингини “инвестициявий” даражага олиб чиқиш», — дейди у ўз Telegram каналида.

Кредит рейтинги ўзи нимага керак?

Кредит рейтинги мамлакатнинг молиявий ишончлилик даражасини баҳолайди. Рейтинг қанчалик юқори бўлса, Ўзбекистон халқаро бозорлардан шунчалик арзон ва қулай шартларда қарз жалб қила олади.

Бундан ташқари, кредит рейтинги хорижий инвесторлар учун ҳам муҳим сигнал бўлиб, мамлакат иқтисодиётига бўлган муносабатни белгилаб беради.

Аввалроқ Fitch Ўзбекистон банкларида муаммоли кредитлар кескин ошиши мумкинлиги ҳақида маълум қилганди.